मुंबई : मुंबईत झिका विषाणूचा (zika virus) दुसरा रुग्ण आढळल्याची चिंताजनक बातमी समोर आली आहे. मुंबई महापालिकेकडून मंगळवारी याबाबतची माहिती देण्यात आली.
मुंबईच्या कुर्ला परिसरात राहणाऱ्या १५ वर्षाच्या मुलीला झिका विषाणूची लागण झाल्याचे समोर आले आहे. तिला बाकीही दीर्घकालीन आजार आहेत. याआधी चेंबूर परिसरात झिका विषाणूचा पहिला रुग्ण सापडला होता. मुंबईतच दुसरा रुग्ण आढळल्याने मुंबईकरांची चिंता अधिकच वाढली आहे.
याआधी चेंबूरमध्ये ७९ वर्षी वृ्द्ध व्यक्तीला झिका विषाणूची लागण झाली होती. २३ ऑगस्टला मुंबई महापालिकेने याबाबतची माहिती दिली होती. चेंबूरमधील या वृद्ध व्यक्तीला १९ जुलैला ताप, सर्दी, खोकला अशी लक्षणे आढळली होती. त्यांना उपचारासाठी खाजगी रुग्णालायत दाखल करण्यात आले होते. २ ऑगस्टनंतर त्यांना बरे वाटल्यानंतर घरी सोडले गेले.
कसा आहे हा आजार
हा आजार झिका विषाणूमुळे पसरतो. हा सौम्य आजार आहे. संक्रमित झालेल्या एडिस डासांमुळे हा आजार पसरतो. मात्र कोरोनाइतका वेगाने हा पसरत नाही. या विषाणूची लागण झालेल्यांमधील ८० टक्के रुग्णांमध्ये ही लक्षणे नसतात. मात्र ज्यांना इतर कोणते आजार आहेत त्यांना मोठ्या प्रमाणात संक्रमित होण्याची भीती असते. झिका विषाणूसाठी कोणत्याही प्रकारची लस सध्या उपलब्ध नाही.