नवी दिल्ली : पाकिस्तानमधील पीटीआय पक्षाचे संस्थापक, माजी पंतप्रधान इम्रान खान आणि माजी परराष्ट्र मंत्री शाह महमूद कुरेशी यांना मंगळवारी सायफर प्रकरणात १० वर्षांच्या तुरुंगवासाची शिक्षा सुनावण्यात आली.
सत्तेत असताना राजकीय हेतूने गोपनीय डिप्लोमॅटिक केबलचा (सायफर) गैरवापर केल्याचा आरोप त्यांच्यावर ठेवण्यात आला होता. यानुसार ऑफिशियल सिक्रेट्स ॲक्ट अंतर्गत स्थापन करण्यात आलेल्या विशेष न्यायालयाने त्यांना ही शिक्षा सुनावली आहे.
पाकिस्तानमध्ये ८ फेब्रुवारीला गुरुवारी मतदान होत आहे, यापूर्वी इम्रान खान यांना ही शिक्षा सुनावण्यात आली आहे. इम्रान खान (७१) आणि कुरेशी (६७) यांना रावळपिंडीच्या अदियाला तुरुंगात ठेवण्यात आले आहे.
गेल्या वर्षी मार्चमध्ये वॉशिंग्टनमधील पाकिस्तानच्या दूतावासाने पाठवलेल्या गुप्त डिप्लोमॅटिक केबलची सामग्री उघड करून अधिकृत गुप्त कायद्याचे उल्लंघन केल्याचा आरोप असलेल्या प्रकरणात त्यांना अटक झाली होती. इम्रान खान यांची एप्रिल २०२२ मध्ये अविश्वास ठरावाद्वारे पंतप्रधान पदावरून हकालपट्टी करण्यात आली होती.