धरमशाला: इंग्लंडने बांगलादेशला(ENG vs BAN) १३७ धावांनी हरवले. बांगलादेशसमोर जिंकण्यासाठी ३६५ धावांचे लक्ष्य ठेवले होते. मात्र शाकिब अल हसनचा संघ ४८.२ षटकांत २२७ धावांवर आटोपला. यासोबतच जोस बटलरच्या नेतृत्वातील इंग्लंड संघाने विश्वचषकातील पहिला विजय मिळवत आपले खाते उघडले. याआधी इंग्लंडला पहिल्या सामन्यात न्यूझीलंडविरुद्ध ९ विकेटनी पराभव सहन करावा लागला होता.
बांगलादेशसाठी सलामीवीर लिटन दासने सर्वाधिक धावा केल्या. या विकेटकीपर फलंदाजाने ६६ बॉलमध्ये ७६ धावा केल्या. त्याने आपल्या डावात ७ चौकार आणि २ षटकार ठोकले. दरम्यान, त्यानंतर बांगलादेशचे फलंदाज सातत्याने बाद होत गेले. मुशफिकुर रहीमने ६४ बॉलमध्ये ५१ धावा केल्या. तर तौहीद हृदयने ६१ बॉलमध्ये ३९ धावांची खेळी केली. बांगलादेशचा कर्णधार शाकिब अल हसन, मेहंदी हसन, नजमुल हौसेन शंटो आणि तंजीद हसन या फलंदाजांनी निराश केले.
इंग्लंडसाठी रीस टॉप्लेने सर्वाधिक ४ विकेट मिळवल्या. रीस टॉप्लेने १० ओव्हरमध्ये ४३ धावा देत ४ विकेट आपल्या नावे केल्या. क्रिस वोक्सला २ विकेट मिळवता आल्या. याशिवाय मार्क वूड, आदिल रशीद, सॅम करन आणि लियाम लिव्हिंगस्टोन यांनी प्रत्येकी एका खेळाडूला बाद केले.
इंग्लंडचा ३६४ धावांचा डोंगर
पहिल्यांदा फलंदाजीस उतरलेल्या इंग्लंडच्या संघाने ५० ओव्हरमध्ये ९ बाद ३६४ धावा केल्या होत्या. इंग्लंडसाठी सलामीवीर डेविड मलानने १०७ बॉलमध्ये १४० धावांची खेळी केली. तर ज्यो रूटने ६८ बॉलमध्ये ८२ धावा केल्या.