कल्याण (वार्ताहर) : छत्रपती शिवाजी महाराजांच्या मराठा नौदलाच्या स्थापनेच्या ३५६ व्या वर्धापन दिनाचे औचित्य साधून दुर्गाडी किल्ला, कल्याण येथे स्मारक स्वरूपात भारतीय नौदलाची युद्धनौका टी-८० विराजमान करण्यासंदर्भात भारतीय नौदल आणि स्मार्ट कल्याण डोंबिवली डेव्हलपमेंट कॉर्पोरेशन लिमिटेड यांनी गुरुवारी सामंजस्य करार केला. टी-८० स्मारक हे आता एसकेडीसीएल च्या नदी किनारा विकास प्रकल्पातील आरमार स्मारकाचा भाग असेल.
लवकरच प्रेक्षकांसाठी निर्माण होणारे हे आरमार स्मारक प्राचीन काळापासून आधुनिक काळापर्यंत राज्याचा समृद्ध सागरी इतिहास दर्शवेल. तसेच कायमस्वरूपी सार्वजनिक प्रदर्शनात भारतीय नौदलाच्या अनेक प्रेरणादायी घटना चित्रे, शिल्पे, कलाकृती आणि मल्टिमिडीयाच्या रूपात मांडले जातील. नियोजनाच्या टप्प्यापासूनच हा प्रकल्प भारतीय नौदलातील अधिकारी आणि अभ्यासकांच्या सक्रिय सहभागासह विकसित केला गेला आहे.