Donald Trump on India: बाळ जन्माला येते आणि लगेच अमेरिकन नागरिक होते, 'इथे एका मूलाला लगेच नागरिकत्व मिळते आणि ते संपूर्ण कुटुंबाला मग तो चीन असो भारत वा जगाच्या इतर कुठल्या नरकातून घेऊन येतं.' अशा शब्दात अमेरिकन राष्ट्राध्यक्ष डोनाल्ड ट्रम्प यांनी भारताविरोधात आणि भारतीयांवर गरळ ओकली. ट्रम्प 'बर्थराईट सिटीझनशिप'च्या विरोधात असून, भारत आणि चीनमधून होणाऱ्या स्थलांतरामुळे अमेरिकेचे नुकसान होत असल्याचे चित्र उभे करण्यासाठी थेट नरकाशी तुलना केली आहे.
ट्रम्प यांनी जन्मजात नागरिकत्वाच्या कायद्यावर टीका करणारा मायकल सॅव्हेज (Michael Savage) यांचा व्हिडिओ शेअर करून या कायद्याच्या दुरुस्तीची गरज अधोरेखित केली आहे. स्थलांतरित लोक केवळ नागरिकत्व मिळवण्यासाठी गरोदरपणाच्या नऊ महिन्यांत अमेरिकेत येतात आणि या कायद्याचा आधार घेऊन स्वतःच्या फायद्यासाठी त्याचा वापर करतात, असा दावा या व्हिडिओमध्ये करण्यात आला आहे. अमेरिकेचे अध्यक्ष डोनाल्ड ट्रम्प यांनी केलेल्या या विधानावर तीव्र प्रतिक्रिया उमटल्या आहेत. ट्रम्प यांच्या या विधानावर आता भारत-चीन ध्वज शेअर करत चीन दूतावासाच्या प्रवक्त्याने तिखट भाषेत सुनावले आहे.
भारतातील चीन दूतावासातील प्रवक्त्या यू जीन यांनी एक्सवर एक पोस्ट शेअर केली. या पोस्टमध्ये त्यांनी अमेरिकेचे अध्यक्ष डोनाल्ड ट्रम्प यांची पोस्ट शेअर ट्रम्प यांना सुनावले आहे. ही पोस्ट शेअर करताना त्यांनी म्हटले आहे की, "व्हायरल झालेले शब्द विरून जातात. पण, खरी भागीदारी संपून जात नाही. द्विपक्षीय संबंध हे बडबडीवर नाही, तर एकमेकांच्या सन्मानावर टिकून असतात", अशा शब्दात त्यांनी ट्रम्प यांना सुनावले. यावेळेस त्यांनी चीन आणि भारताचा झेंडा देखील पोस्ट केला आहे.
