रोहा (वार्ताहर) : युरोपातील ईस्टोस्निया या देशात नुकत्याच पार पडलेल्या जागतिक फिल्ड आर्चरी (तिरंदाजी) स्पर्धेत सर्वेश निवास थळे याने रौप्य पदक जिंकले. या स्पर्धेत ४७ देशांचा सहभाग होता.
मूळचा अलिबाग तालुक्यातील कुर्डुस या गावातील सर्वेश थळे हा सध्या रोठखुर्द रोहा येथे राहतो. तेथेच राहून त्याने धनुर्विद्येचे धडे घेतले. अनेक जिल्हा, राज्य व राष्ट्रीय स्पर्धा, शालेय स्पर्धा, सी.बी.एस.सी. या स्पर्धांमधील सातत्यपूर्ण कामगिरीच्या जोरावर त्याची निवड भारतीय तिरंदाजी संघात झाली. अंडर १४ या गटात त्याची भारतीय संघात निवड झाली.
सर्वेशचे वडील निवास थळे हे पुगाव प्राथमिक शाळेचे मुख्याध्यापक असून ते एक उत्तम क्रीडापटू, राष्ट्रीय कबड्डी पंच, खो-खो पंच, क्रीडा मार्गदर्शक व क्रीडा समन्वयक आहेत. सर्वेशच्या या देदीप्यमान कामगिरीबद्दल त्याचे सर्वच स्तरातून अभिनंदन होत आहे. ईस्टोस्नियातील भारतीय दूतावासात भारतीय राजदूत अजनीश कुमार यांनी सर्वेशचा आणि भारतीय संघाचा सत्कार केला.