मुंबई : एसटी गळतीच्या बातम्या आपणांस नेहमीच ऐकायला मिळतात. मात्र आता मुंबईहून जबलपूरला जाणाऱ्या स्पाइसजेटच्या एका विमानाचे छत गळत असल्याचा एक व्हिडिओ चांगलाच व्हायरल झाला आहे. विमानातील एका प्रवाशाने हा व्हिडिओ सार्वजनिक केला. त्याने या घटनेची हवाई सुंदरी व कॅप्टनकडे तक्रार केली. पण त्यांनी त्याकडे दुर्लक्ष केले. एअर होस्टेसने तक्रारदार प्रवाशाला यासाठी आम्ही जबाबदार नाही दुसरीकडे जावून बसा, असे सांगितले.
जबलपूरच्या कमल ग्रोव्हर यांनी सांगितले की, बुधवारी ते स्पाइसजेटच्या फ्लाइट एसजी-३००३ ने मुंबईहून जबलपूरला जात होते. या विमानाने मुंबईहून ४.५५ वा. उड्डाण घेतले. त्यानंतर सायंकाळी ६.५५ वा. ते जबलपूरला पोहोचले. मुंबईत विमानात चढताच विमानाच्या शीट्स पाण्याने भिजलेल्या दिसून आल्या. तासाभराच्या विलंबानंतर विमान आकाशात झेपावल्यानंतरही विमानाच्या छतातून पाणी टपकत होते.
कमल ग्रोव्हर यांनी आपल्या या प्रवासाचा व्हिडिओ सोशल मीडियावर सार्वजनिक केला. आपला संपूर्ण प्रवास विमानात पावसाच्या आनंदात गेल्याचे ते म्हणाले.