मुंबई : राज्याचे मुख्यमंत्री देवेंद्र फडणवीस यांच्या मार्गदर्शनात नागपूर जिल्ह्यातील कामठी येथील शासकीय औद्योगिक प्रशिक्षण संस्थेला (ITI) शहीद हेमंत करकरे यांचे नाव देण्याचा निर्णय कौशल्य विकास विभागाने घेतला आहे. या निर्णयामुळे देशासाठी बलिदान देणाऱ्या शूर अधिकाऱ्याच्या स्मृतीला अभिवादन करण्यात येत असून, विद्यार्थ्यांमध्ये देशभक्ती व कर्तव्यनिष्ठेची प्रेरणा निर्माण होणार असल्याचे प्रतिपादन कौशल्य विकास मंत्री मंगलप्रभात लोढा यांनी केले. रविवारी १९ एप्रिल २०२६ रोजी सकाळी दहा वाजता कामठी येथे मुख्यमंत्री देवेंद्र फडणवीस यांच्या उपस्थितीत हा समारंभ होणार असून राज्याचे उपमुख्यमंत्री एकनाथ शिंदे ,उपमुख्यमंत्री सुनेत्रा पवार तसेच महसूल मंत्री चंद्रशेखर बावनकुळे हे या कार्यक्रमाला उपस्थित राहणार आहेत.
मुंबईतल्या २६/११च्या हल्ल्यात दहशतवाद्यांशी लढताना शहीद झालेले हेमंत करकरे हे महाराष्ट्र दहशतवाद विरोधी पथकाचे (ATS) प्रमुख होते. त्यांचे बलिदान भारतीय विसरू शकत नाहीत. शहीद करकरे यांचे धैर्य, नेतृत्वगुण आणि परमोच्च देशसेवेच्या सन्मानार्थ आयटीआयचे नामकरण करण्यात येत असल्याचे राज्याचे कौशल्य विकास मंत्री मंगलप्रभात लोढा यांनी सांगितले. नामकरणामुळे कामठी येथील आयटीआय संस्थेची ओळख अधिक प्रेरणादायी ठरणार असून, येथील विद्यार्थी करकरे यांच्या आदर्शातून प्रेरणा घेऊन कौशल्य विकासासोबतच राष्ट्रसेवेची भावना जोपासतील, असा विश्वास मंत्री लोढा यांनी व्यक्त केला आहे. याप्रसंगी शासकीय तांत्रिक विद्यालयाच्या नवीन इमारतीचे लोकार्पणही करण्यात येणार आहे.
