मुंबई : माजी मंत्री बाबा सिद्दीकी यांच्या हत्येची जबाबदारी लॉरेन्स बिश्नोई गँगने घेतली आहे. बिश्नोई गँगकडूनच अभिनेता सलमान खानला मागच्या अनेक दिवसांपासून जीवे मारण्याची धमकी दिली जात असल्याने सलमान खानच्या सुरक्षेत पुन्हा वाढ करण्यात आली आहे.त्याच्या घरापासून फार्म हाऊसपर्यंत पोलीस बंदोबस्त तैनात करण्यात आला आहे.
सलमान खानला यापूर्वी वाय प्लस श्रेणी सुरक्षा देण्यात आली होती, जी आता अपग्रेड करण्यात आली आहे. सलमान खानच्या सुरक्षेत आता पोलिसांच्या एस्कॉर्ट कारचा समावेश करण्यात आला आहे. जेव्हा सलमान घराबाहेर पडेल त्यावेळी ही कार त्याच्यासोबत असेल.
सलमान खानच्या वांद्रे येथील गॅलेक्सी अपार्टमेंटबाहेर मोठ्या प्रमाणात पोलीस बंदोबस्त तैनात करण्यात आला आहे.त्याच्या घराबाहेर पोलीस कडेकोट बंदोबस्तामध्ये आहेत. माध्यमांनाही त्याच्या घराजवळ परवानगी नाकारण्यात आली आहे. त्याचप्रमाणे सलमानच्या पनवेल फार्म हाऊसची सुरक्षाही वाढवण्यात आली आहे.फार्म हाऊसच्या आत आणि बाहेर पोलीस तैनात करण्यात आली आहे. याशिवाय या फार्म हाऊसकडे जाणारा रस्ताही बंद करण्यात आला आहे.
