BMC News : उबाठा,काँग्रेस नगरसेवकांच्या प्रभागात कोटींचा निधी

- निधी वाटपात भेदभाव केल्याचा आरोप, पण भाजपने राखला विरोधी पक्षाच्या नगरसेवकांचाही मान

मुंबई (सचिन धानजी)

मुंबई महापालिकेच्या निधी वाटपात भेदभाव झाला असल्याचा आरोप उबाठा आणि काँग्रेसकडून केला जात असला तरी प्रत्यक्षात भाजपने उबाठासह काँग्रेसच्या काही नगरसेवकांना भरुभरुन निधी दिल्याचे दिसून येत आहे. स्थायी समितीच्यावतीने अर्थसंकल्पात विकास कामांसाठी तरतूद करण्यात आलेल्या निधीमध्ये उबाठा आणि काँग्रेसच्या नगरसेवकांच्या प्रभागांमध्ये भरीव तरतूद केल्याचे दिसून आले आहे. त्यामुळे भाजप, शिवसेना महायुतीकडून विरोधी पक्षांच्या नगरसेवकांना निधी न दिल्याचा आरोप न करणाऱ्या विरोधी पक्षनेत्यांसह काँग्रेसच्या नेत्यांचे आरोप बिनबुडाचे असल्याचे स्प्ष्ट होत आहे.

मुंबई महापालिकेचा अर्थसंकल्प स्थायी समितीमध्ये मंंजूर करताना त्यात तब्बल ८०० कोटी रुपयांची सुधारीत तरतूद करण्यात आली आहे. अंतर्गत निधीमध्ये फेरबदल करत या ८०० कोटी रुपयांच्या निधीचा अंतर्भाव करण्यात आला आहे. या ८०० कोटी रुपयांची तरतूद करताना नगरसेवकांना प्रत्येकी १ कोटींचा विकास निधी देण्यात आला. आणि याशिवाय प्रत्येक नगरसेवकांना वेगळा विकास निधी देण्यात आला. यामध्ये उबाठा आणि काँग्रेसच्या नगरसेवकांना प्रत्येकी २५ लाख रुपयांचा विकास निधी देण्यात आला असून या निधी वाटपात विरोधी पक्षावर अन्याय झाला असल्याचा आरोप विरोधी पक्षनेत्या किशाेरी पेडणेकर आणि काँग्रेसच्या मुंबई अध्यक्षा वर्षा गायकवाड यांनी केला होता.

मात्र, उबाठाच्या नगरसेवकांना विकास निधी दिला नसला तरी माहिम, शिवाजीपार्कमधील उबाठा नगरसेवकांच्या प्रभागांमध्ये मेाठ्याप्रमाणात निधीची तरतूद दिसून येत आहे. याशिवाय भांडुप पश्चिममधील उबाठाच्या दोन आणि काँग्रेसच्या एका नगरसेवकांच्या प्रभागांमध्ये प्रत्येकी एक कोटी रुपयांची तरतूद दिसून येत आहे.

एवढेच नाहीतर मदनपुरा, नागपाडा येथील काँग्रेसच्या एका नगरसेवकांच्या प्रभागातही तब्बल दोन कोटींची तरतूद दिसून येत आहे. त्यामुळे एका बाजुला या दोन्ही पक्षाकडून निधी वाटपात भेदभाव केला जात असल्याचा आरोप होत असतानाच सुधारीत तरतुद केलेल्या नोंदीनुसार उबाठाचे चार आणि काँग्रेसच्या दोन नगरसेवकांच्या प्रभागांमध्ये चांगल्याप्रकारे निधीची तरतूद झाल्याचे दिसून आल्याने एकप्रकारे तरतूद केलेल्या प्रभागांचे प्रतिनिधीत्व करणाऱ्या नगरसेवकांचे भाजपशी चांगल्याप्रकारे व मैत्रीपूर्व संबंध असल्याचे स्पष्ट होत आहे.

माहिम, दादर परिसर

पंडित दिनदयाळ उद्यान येथील मोडकळीस आलेल्या व्यायामशाळांचे नुतनीकरण : २५ लाख

शिवाजीपार्क चौपाटी येथे सुशोभीकरण : २५ लाख रुपये

महाराष्ट्र् संयुक्त कलादालन : ५ लाख रुपये

शिवाजीपार्क मैदानात पाणी फवारणीकरता स्प्रिंकलर्स : २५ लाख रुपये

माहिम येथील स्वामी विवेकानंद उद्यानाचे सुशोभीकरण : ५० लाख रुपये

भागोजी किर स्मशानभूती सुशोभिकरण व नुतनीकरण : २५लाख रुपये

भांडुप पश्चिम,कांजूर गाव

एस विभागातील भांडुप पश्चिम येथील गावदेवी रोड, टेंबीपाडा येथील गलिच्छ वस्तींची सुधारणा : १ कोटी रुपये

भांडुप प्रकाश नगर,आझाद नगर : १ कोटी रुपये

एस विभागातील भांडुप पश्चिम येथील रावते कंपाऊंड १,२,३येथे गटार लादीकरण : ५० लाख रुपये

भांडुप पश्चिम येथील रामनगर तानाजी वाडी,आंब्याची भरणी येथील गटार,लादीकरण : ५० लाख रुपये

मदनुपरा, नागपाडा

मदनपुरा ड्रेनेज : ७५ लाख रुपये

मदनपुरा नयानगर, ७५ लाख रुपये

चौथी साखळी रस्ता : ५० लाख रुपये