निठारी प्रकरणात अलाहाबाद उच्च न्यायालयाने केला निर्णय रद्द
गाझियाबाद/अलाहाबाद : नोएडाच्या निठारी प्रकरणातील १९ मुलींची हत्या करणाऱ्या दोषींना गाझियाबादच्या सीबीआय कोर्टाने फाशीची शिक्षा सुनावली होती. मात्र अलाहाबाद उच्च न्यायालयाने सुरेंद्र कोली आणि मोनिंदर सिंह पंधेरचे अपील स्वीकारले असून फाशीला स्थगिती दिली आहे. न्यायमूर्ती अश्वनी कुमार मिश्रा आणि न्यायमूर्ती एसएचए रिझवी यांच्या खंडपीठाने हा निकाल दिला आहे. प्रदीर्घ चर्चेनंतर सप्टेंबर महिन्यात अपिलावरील निर्णय राखून ठेवण्यात आला होता.
२००५ आणि २००६ मध्ये निठारी घटनेत मुली आणि महिलांवर बलात्कार आणि खून असे एकूण १९ गुन्हे दाखल झाले होते. तीन प्रकरणांमध्ये पोलिसांनी पुराव्याअभावी क्लोजर रिपोर्ट दाखल केले. सीबीआय कोर्ट गाझियाबादचा निर्णय १६ प्रकरणांमध्ये आला आहे. यात सुरेंद्र कोलीला १३ गुन्ह्यांमध्ये फाशीची शिक्षा झाली असून तीन प्रकरणांमध्ये निर्दोष मुक्तता करण्यात आली आहे.
तर मोनिंदर पंधेरला दोन खटल्यात फाशीची शिक्षा, एका प्रकरणात सात वर्षांचा कारावास आणि चार प्रकरणात निर्दोष मुक्तता झाली. दोन्ही दोषींनी फाशीच्या शिक्षेविरोधात अलाहाबाद उच्च न्यायालयात अपील दाखल केले होते. फाशीच्या सर्व खटल्यांवर उच्च न्यायालयाने निकाल दिला आहे. त्यांच्या फाशीच्या शिक्षेला स्थगिती देण्यात आली आहे.
निठारी हे गाव नोएडाच्या सेक्टर-३१ मध्ये आहे. मोनिंदर पंधेर डी-५ कोठी येथे राहत होता. मोनिंदर हा मूळचा पंजाबचा. २००० मध्ये त्याने हे घर विकत घेतले होते. हे कुटुंब २००३ पर्यंत एकत्र राहिले, त्यानंतर मोनिंदर वगळता सर्वजण पंजाबला गेले. मोनिंदर घरात एकटाच राहत होता.
यावेळी त्याने अल्मोडा (उत्तराखंड) येथील सुरेंद्र कोली याला आपल्या घरात नोकर म्हणून ठेवले. मोनिंदर अनेकदा मुलींना या घरी बोलावत असे. एकदा सुरेंद्र कोलीने तिथे आलेल्या कॉल गर्लसोबत शारीरिक संबंध ठेवण्याची इच्छा व्यक्त केली आणि कॉल गर्लने असे काही सुनावले की ज्यामुळे सुरेंद्रला वाईट वाटले. सुरेंद्रने तिचा गळा आवळून खून करून मृतदेह नाल्यात फेकून दिला.
डी-५ कोठीतील हा पहिला खून होता. यानंतर या घरात आलेली मुलगी जिवंत परतली नाही. हळूहळू या भागातून अनेक मुली बेपत्ता होऊ लागल्या. प्रत्यक्षदर्शींनी त्यांना अखेरचे या घराबाहेर पाहिले होते, मात्र ठोस पुराव्याअभावी पोलिसांना मोनिंदर-सुरेंद्र यांना हात लावता आला नाही.
२५ वर्षीय आनंदा देवी देखील त्यापैकी एक होती. ती मोनिंदर पंधेरच्या घरी घरगुती नोकर म्हणून आली होती आणि ३१ ऑक्टोबर २००६ रोजी बेपत्ता झाली. याआधी उधम सिंग नगर (उत्तराखंड) येथील दीपिका उर्फ पायल ही ७ मे २००६ रोजी मोनिंदर सिंग पंधेरकडे नोकरीच्या शोधात गेली होती, तीही परत आली नाही. याप्रकरणी २४ ऑगस्ट २००६ रोजी नोएडा पोलिसांनी अपहरणाचा गुन्हा दाखल करून तपास सुरू केला तेव्हा दीपिकाचा मोबाइल सुरेंद्र कोलीचा असल्याचे आढळून आले.
मोनिंदर पंधेर आणि सुरेंद्र कोली यांचा कोणत्या ना कोणत्या प्रकरणात सहभाग असल्याची ही पहिलीच घटना होती. पोलिसांनी त्याची कसून चौकशी केली असता त्याने दीपिका उर्फ पायल हिचा बलात्कार करून खून करून तिचा मृतदेह घराजवळील नाल्यात फेकल्याची कबुली दिली. २९ आणि ३० डिसेंबर २००६ रोजी, नोएडा पोलिसांनी एका नाल्यातून मोठ्या प्रमाणात मानवी सांगाडे जप्त केले, ते सुद्धा फक्त मुलींचे.
मोनिंदर पंधेर आणि सुरेंदर कोली हे तरुणींना कोणत्या ना कोणत्या बहाण्याने येथे बोलावून त्यांच्यावर बलात्कार करून त्यांची हत्या करून मृतदेह या नाल्यात फेकून देत असल्याचे उघड झाले. नोएडा पोलिसांनी मोनिंदर सिंग पंधेर आणि सुरेंद्र कोली यांच्याविरुद्ध बलात्कार आणि हत्येचे एकूण १९ गुन्हे दाखल केले आहेत. त्यापैकी १६ प्रकरणांमध्ये न्यायालयाचे निर्णय आले आहेत.
Get latest Marathi News, Maharashtra News and Latest Mumbai News from Politics, Sports, Entertainment, Business and local news from Mumbai and All cities of Maharashtra