मुंबई : मुंबईचा अग्रमानांकित इंडिया कॅडेट इंटरनॅशनल ओम कदमने अपेक्षेनुसार आयआयएफएल मुंबई ज्युनियर (१३ वर्षाखालील ) बुद्धिबळ स्पर्धा सर्वच्या सर्व ९ डावातील दमदार विजयासह जिंकली. शेवटच्या आणि नवव्या फेरीत अन्या रॉयला पराभूत करीत ९ गुणांसह झळाळत्या चषकावर आपले नाव कोरले. त्याने ट्रॉफीसह ५० हजार रुपयांचे घसघशीत रोख पारितोषिकही मिळवले.
कफ परेड भागात खेळवण्यात आलेल्या या प्रतिष्ठेच्या बुद्धिबळ स्पर्धेत ज्युनिअर गटात गौरांग बागवेने अर्जुन आदिरेड्डीला पराभूत करत दुसऱ्या स्थान मिळवताना रोख ३० हजार रुपयांचे पारितोषिक मिळवले. मानस गायकवाडने तिसऱ्या स्थानासह २० हजार रुपये तर यश भराडियाने चौथ्या स्थानासह १५ हजार रुपयांचे पारितोषिक पटकावले. पाचव्या स्थानावर आलेल्या पारस भोइरला १० हजाराचे बक्षीस देण्यात आले.
जागतिक बुद्धिबळ संघटनेच्या (फिडे ) नॉर्मनुसार आयोजित आयआयएफएल मुंबई ज्युनियर बुद्धिबळ स्पर्धेचे आयोजन मुंबई चेस स्कूलने मुंबई शहर बुद्धिबळ संघटना , महाराष्ट्र बुद्धिबळ संघटना आणि अखिल भारतीय बुद्धिबळ संघटनेच्या सहकार्याने केले होते. स्पर्धेचे संचालन फिडेचे आंतरराष्ट्रीय बुद्धिबळ संयोजक प्रफुल्ल झवेरी यांनी केले. तर मुख्य पंच म्हणून आंतरराष्ट्रीय ऑर्बिटर पी बी भिलारे यांनी धुरा सांभाळली. विजेत्या बुद्धिबळपटूंना रोख अडीच लाख रुपये आणि ३० पदके पारितोषिका दाखल देण्यात आली.
अन्या रॉय सर्वोत्तम कन्या बुद्धिबळपटू
स्पर्धेतील सर्वोत्तम कन्या बुद्धिबळपटू म्हणून अन्या रॉयला ७,५०० रुपये तर दुसऱ्या स्थानासाठी स्वस्ती झा हिला ५ हजार रुपयांचे पारितोषिक देण्यात आले.