कल्याण : शिक्षक, कारकून, मामलेदार ते उपजिल्हाधिकारी अशा विविध पदांवर ब्रिटीश शासनात नोकरी केलेल्या कल्याणच्या सदाशिव मोरेश्वर साठे यांनी १८६४ साली कल्याणमध्ये सार्वजनिक वाचनालय संस्कृतीचा पाया रचला. या ऐतिहासिक वाचनालयाचे हे शतकोत्तरी हीरक महोत्सवी वर्ष असून या कार्यक्रमाची सुरुवात ३ फेब्रुवारी रोजी करण्यात आली. यावेळी ज्येष्ठ वाचक बाळकृष्ण धुरी, चंद्रकांत उदावंत, मोहन पिंपळखरे यांच्या हस्ते संस्थापक सदाशिव साठे यांच्या प्रतिमेचे पूजन करून प्रतिमेस पुष्पहार अर्पण करण्यात आला.

सुरुवातीला दूरदर्शन कलावंत सुधाकर वसईकर यांनी सदाशिव साठे यांच्याविषयी माहिती दिली. शतकोत्तर हीरक महोत्सवी वर्षानिमित्त अनेक कार्यक्रम वर्षभर साजरे करण्यात येणार असून त्याकरिता वाचकांनी वाचन संस्कृती वाढविण्यास सहकार्य करावे, असे आवाहन वाचनालयाचे अध्यक्ष मिलिंद कुलकर्णी यांनी केले. यावेळी ग्रंथ समिती सदस्य अरविंद शिंपी, सरचिटणीस भिकू बारस्कर, सहग्रंथपाल करुणा कल्याणकर, ग्रंथसेविका तसेच वाचकवर्ग मोठ्या संख्येने उपस्थित होता.

कर्मचाऱ्यांना सेवेत कायम करण्याचे नगरविकास विभागाचे आदेश

कल्याण : कल्याण डोंबिवली महानगरपालिका परिवहन उपक्रमातील गेल्या २० वर्षांपासून कंत्राटी पदावर काम करणारे ११ चालक व ४८ वाहक यांचा वनवास संपला असून महाराष्ट्र शासनाच्या नगरविकास विभागाने या कर्मचाऱ्यांना सेवेत कायम करण्याचा प्रशासकीय आदेश पारित केला आहे. या कामी महाराष्ट्र राज्याचे मुख्यमंत्री एकनाथ शिंदे, खासदार डॉ. श्रीकांत शिंदे यांच्या सहकार्याने तसेच संघटना अध्यक्ष रवि पाटील यांच्या प्रयत्नाने या कर्मचाऱ्यांना कायम करण्याचा मार्ग मोकळा झाला आहे.

नगरविकास विभागाचे प्रधान सचिव सोनिया सेठी, केडीएमसी आयुक्त भाऊसाहेब दांगडे, अप्पर सचिव प्रतिभा पाटील, परिवहन व्यवस्थापक दिपक सावंत, उपपरिवहन व्यवस्थापक संदिप भोसले आणि या कार्यात ज्यांनी ज्यांनी सहकार्य केले त्या संघटनेचे उपाध्यक्ष प्रतिक पेणकर या सर्वांचे परिवहन कर्मचाऱ्यांच्या वतीने परिवहन कामगार कर्मचारी संघटनेचे सरचिटणीस शरद जाधव यांनी आभार मानले आहेत.

कल्याण डोंबिवली महानगरपालिका परिवहन उपक्रमाच्या आस्थापनेवर कंत्राटी पध्दतीने, कल्याण-ड तात्पुरत्या स्वरूपात किमान वेतन व ठोक मानधनावर ४८ वाहक व ११ चालक, असे एकूण ५९ कर्मचारी कार्यरत असून, त्यांच्या भरतीची कार्यवाही सन २००३ व २००४ मध्ये करण्यात आली होती. कल्याण-डोंबिवली महानगरपालिका परिवहन उपक्रमाच्या आस्थापनेवर विहित प्रक्रिया पार पाडून कंत्राटी पध्दतीने तात्पुरत्या स्वरूपात, किमान वेतन ठोक मानधनावर कार्यरत असलेल्या ४८ वाहक व ११ चालक अशा एकूण ५९ कर्मचाऱ्यांचे महानगरपालिकेच्या आकृतीबंधातील मंजूर व रिक्त पदांवर समावेश करण्यास शासनाची मान्यता देण्यात येत असल्याचा शासन निर्णय नगरविकास विभागाने गुरुवारी पारित केला आहे. यामुळे या कंत्राटी कामगारांमध्ये आनंदाचे वातावरण पसरले आहे.