मुंबई : दहीहंडी उत्सवाचा थरार आणि खेळाडूंचा जोश अनुभवणाऱ्या 'प्रो गोविंदा सीझन ४' (Pro Govinda Season 4 2026) चा अंतिम सामना अत्यंत चुरशीच्या वातावरणात पार पडला. अंतिम फेरीत आपल्या प्रतिस्पर्ध्यांवर मात करत नागपूर निन्जाज (आर्यन गोविंदा पथक) संघाने सलग दुसऱ्या वर्षी जेतेपदावर नाव कोरले.
विजेत्यांवर बक्षिसांचा वर्षाव
विजेते (चॅम्पियन) : नागपूर निन्जाज (आर्यन गोविंदा पथक) – ₹७५ लाख रोख आणि मानाची भव्य ट्रॉफी.
उपविजेते (१st रनर अप) : नाशिक रेंजर्स – ₹५० लाख रोख आणि ट्रॉफी.
तृतीय क्रमांक (२nd रनर अप) : अलिबाग नाईट्स – ₹२५ लाख रोख आणि ट्रॉफी.
अंतिम सामन्यानंतर झालेल्या शानदार बक्षीस वितरण समारंभात प्रो गोविंदाचे ब्रँड ॲम्बेसेडर आणि भारतीय क्रिकेटपटू सूर्यकुमार यादव यांच्या हस्ते विजेत्या नागपूर निन्जाज संघाला ७५ लाखांचा धनादेश व ट्रॉफी देऊन गौरवण्यात आले. तर मंत्री प्रताप सरनाईक यांच्या हस्ते उपविजेत्या नाशिक रेंजर्स (५० लाख) आणि तृतीय क्रमांकावरील अलिबाग नाईट्स (२५ लाख) संघांना बक्षिसे प्रदान करण्यात आली.
गेल्या वर्षीही चॅम्पियन ठरलेल्या आर्यन गोविंदा पथकाने या वर्षीही आपल्या उत्कृष्ट कौशल्याच्या आणि शिस्तीच्या जोरावर बाजी मारत आपली विजयी घोडदौड कायम ठेवली. या यशानंतर क्रीडाप्रेमी आणि गोविंदा पथकांमध्ये जल्लोषाचे वातावरण पाहायला मिळत आहे.
