शिक्षण पूर्ण झाल्यानंतर पदवी मिळवण्याचा दिवस प्रत्येक विद्यार्थ्यासाठी अत्यंत जिव्हाळ्याचा आणि खास असतो. या दिवशी बहुतांश तरुण-तरुणी आपल्या कुटुंबासोबत, आई-वडिलांसोबत किंवा मित्रपरिवारासोबत सुंदर फोटोशूट करून हा क्षण कायमचा कॅमेऱ्यात कैद करतात. मात्र, अमेरिकेतील (America) एका धाडसी तरुणीने आपला ग्रॅज्युएशन डे (Graduation Day) अशा काही भयानक आणि थरारक पद्धतीने साजरा केला आहे, ज्याची सध्या संपूर्ण जगभरात जोरदार चर्चा सुरू आहे. या तरुणीने चक्क एका १४ फूट लांबीच्या महाकाय मगरीसोबत फोटोशूट करत पाहणाऱ्या सर्वांच्याच पायाखालची जमीन सरकवली आहे.
मुंबई : मुंबईतील वांद्रे पूर्व (Mumbai Bandra East) रेल्वे स्थानकालगत असलेल्या 'गरीब नगर' (Garib Nagar) झोपडपट्टीवर प्रशासनाचा बुलडोझर सध्या वेगाने फिरत आहे. पश्चिम ...
उघड्या जबड्यावर दिले चुंबन
View this post on Instagram
मॅकनीस स्टेट युनिव्हर्सिटीमधून (McNeese State University) नुकतीच पदवी प्राप्त केलेल्या कॅट डेली (Kat Daly) या तरुणीने हा अजब आणि अंगावर शहारे आणणारा पराक्रम केला आहे. पदवी मिळाल्याचा आनंद काहीतरी हटके पद्धतीने साजरा करण्याच्या उद्देशाने कॅटने एक भन्नाट शक्कल लढवली. अंगावर नेव्ही ब्लू रंगाचा ग्रॅज्युएशन गाऊन आणि डोक्यावर ग्रॅज्युएशन कॅप परिधान केलेल्या अवस्थेत ती थेट पाण्यात उतरली. धक्कादायक बाब म्हणजे, तिथे असलेल्या तब्बल १४ फुटी मगरीच्या ती नुसती जवळच गेली नाही, तर तिने त्या मगरीच्या उघड्या जबड्यावर चक्क चुंबन (Kiss) घेतले. तिचा हा काळजाचा ठोका चुकवणारा स्टंट सध्या सोशल मीडियावर वाऱ्यासारखा पसरला आहे.
कोण आहे कॅट डेली ?
वरवर पाहता हा एखाद्याचा निव्वळ वेडेपणा किंवा प्रसिद्धीसाठी केलेला स्टंट वाटत असला तरी, यामागे एक मोठे सत्य दडलेले आहे. कॅट ही मगरींसोबत वावरणारी कोणतीही नवशिख्या किंवा सामान्य तरुणी नाही. ती आपल्या होणाऱ्या पतीसोबत मिळून 'गेटर कंट्री' (Gator Country) नावाचे एक रेस्क्यू पार्क (Rescue Park) चालवते. वयाच्या अवघ्या सातव्या वर्षापासून ती अशा खतरनाक आणि जंगली प्राण्यांच्या सानिध्यात वाढली आहे. विशेष म्हणजे, या फोटोशूटदरम्यान कॅटच्या हातात एक अत्यंत विषारी सापही होता, ज्याला ती एखाद्या बाहुलीसारखे लीलया हाताळत होती. तिला पाहून फोटोग्राफरलाही मगरीपेक्षा त्या विषारी सापाचीच जास्त धास्ती वाटत होती!
समाजाला दिलेला संदेश आणि कडक इशारा
या अत्यंत जीवघेण्या फोटोशूटमागे कॅटचा एक खास आणि महत्त्वाचा हेतू दडलेला होता. मगरींबद्दल लोकांच्या मनात असलेली अनाठायी भीती आणि गैरसमज दूर करण्याचा तिचा प्रयत्न होता. 'मगरी नेहमीच आक्रमक नसतात आणि विनाकारण माणसांवर हल्ला करत नाहीत,' हे तिला या फोटोंच्या माध्यमातून जगाला दाखवून द्यायचे होते. तिचे हे फोटो आज जगभरात आश्चर्याचा विषय ठरत असले तरी, सामान्य लोकांसाठी यातून एक कडक इशाराही देण्यात आला आहे. कॅट ही एक अत्यंत अनुभवी आणि प्रशिक्षित प्राणीमित्र असल्याने तिला मगरींना कसे हाताळावे हे अचूक माहिती आहे. मात्र, सामान्य नागरिकांनी कोणत्याही परिस्थितीत घराच्या आसपास किंवा जंगलात अशा प्रकारचा स्टंट करण्याचा किंवा जंगली प्राण्यांच्या जवळ जाण्याचा अजिबात प्रयत्न करू नये, असा स्पष्ट इशारा देण्यात आला आहे.
