मृतांमध्ये नऊ महिन्यांच्या चिमुकल्याचा समावेश; तर तीन जण जखमी
अकोला : गेल्या काही दिवसांत अपघातांच्या घटनांमध्ये वाढ झालेली असतानाच आता अकोला जिल्ह्यातून (Akola news) अपघाताची (Accident) घटना समोर आली आहे. शिक्षक आमदार किरण सरनाईक (Kiran Sarnaik) यांच्या कुटुंबियांच्या गाडीचा आज दुपारी पातूर शहराजवळ भीषण अपघात झाला. या अपघातामध्ये पाच जणांचा मृत्यू झाला आहे, ज्यात किरण सरनाईक यांच्या कुटुंबातील ४ व्यक्तींचा समावेश आहे. तर तीन जण जखमी झाले आहेत.
मिळालेल्या माहितीनुसार, कारमधून किरण सरनाईक यांचा भाऊ, भावाचा मुलगा, मुलगी आणि नात प्रवास करत होते. वाशिम रोडवर दोन कारची समोरासमोर जोरदार धडक झाल्यामुळे हा अपघात झाला आहे. हा अपघात इतका भीषण होता की दोन्ही कारचा चक्काचूर झाला आहे. पोलिसांनी घटनास्थळी पंचनामा केला असून गुन्हा दाखल करण्याचे काम सुरु आहे.
अपघातामध्ये किरण सरनाईक यांचे पुतणे रघुवीर सरनाईक (वय २८) यांचा मृत्यू झाला आहे. तसेच शिवाजी आमले (वय ३०), सिद्धार्थ यशवंत इंगळे (वय ३५) आणि एका नऊ महिन्यांच्या मुलासह पाच जणांचा मृत्यू झाला आहे. या अपघातामध्ये तीन जण जखमी झाले आहेत. त्यात पियुष देशमुख (वय ११), सपना देशमुख आणि श्रेयस इंगळे यांचा समावेश आहे. जखमींना अकोला येथील रुग्णालयात दाखल करण्यात आले आहे.
