मुंबई: लोकसभा निवडणूक २०२४साठी(loksabha election 2024) काँग्रेसने उमेदवारांची आणखी एक यादी सोमवारी रात्री जाहीर केली. पक्षाकडून जाहीर करण्यात आलेल्या १०व्या यादीत दोन नावे आहेत यातील एक महाराष्ट्रातून तर दुसरे नाव दक्षिण भारतातील तेलंगणा येथून आहे.
पक्षाने आतापर्यंत २१४ उमेदवारांची घोषणा केलेली आहे. काँग्रेसने याआधी नऊ वेगवेगळ्या यादींमधून २१२ उमेदवारांच्या नावाची घोषणा केली होती. सोमवारी रात्री त्यांनी अकोला आणि तेलंगणाच्या वारंगल येथून उमेदवाराच्या नावाची घोषणा केली.
अकोला येथून काँग्रेसकडून अभय काशीनाथ पाटील यांना उमेदवारी देण्यात आली आहे तर तेलंगणामधील वारंगल येथून कादियाम काव्य यांना उमेदवारी दिली आहे.
अकोल्यात प्रकाश आंबेडकर विरुद्ध अभय पाटील
दरम्या, अकोला मतदारसंघातून वंचित बहुजन आघाडीचे अध्यक्ष प्रकाश आंबेडकर हे निवडणुकीच्या रिंगणात आहे. २०१९च्या लोकसभा निवडणुकीत अकोलाच्या जागेवर भाजपने विजय मिळवला होते. भाजपचे संजय शामराव धोत्रे येथून खासदार म्हणून निवडून आले होते. ते सलग पाचवेळा लोकसभा निवडणूक जिंकले आहेत.