Sunday, July 21, 2024
Homeसाप्ताहिककिलबिलप्रियंवदा कविता आणि काव्यकोडी

प्रियंवदा कविता आणि काव्यकोडी

आईने अंगणात लावली
चिमुकली जाईची वेल
तीची काळजी घेण्यात
ती घालवी बराच वेळ

चिमुकली जाई हळूहळू
मांडवावर चढली
पाहता पाहता भरभर
आधाराने वाढली

सुंदर जाईची फुलं
सायंकाळी फुलती
त्यांच्या मंद सुगंधाने
भुरळ सर्वांना घालती

फुलं शुभ्र नाजूक
पाकळ्या छान पसरट
त्यांची खालची बाजू
गुलाबी नि जांभळट

दिसायला गोजिरवाणी
नाजूक ही फुले
वेलीवर जणू डोलतात
गोड हसरी मुले

चमेली, प्रियंवदा ही
जाईचीच आहेत नावे
एवढेच ठाऊक त्यांना
सुगंध वाटीत जावे

काव्यकोडी : एकनाथ आव्हाड 

१) लांब काकडी
गोल भोपळा
आतून नुसताच
हवेचा गोळा

टाचणी टोचतात
फटकन फुटतो
नव्या रंगरूपात
कोण बरं भेटतो?

२) घरासाठी राबताना
दिसते हसतमुख
मुलांच्या सुखातच
असे तिचे सुख

मुलांसाठी आनंदाने
चंदन ती होई
संसाराची शिदोरी
सांगा कोणी देई?

३) चोच आहे, पंख आहे
रंग याचा काळा
बाळाच्या खाऊवर
असे याचा डोळा

गोष्टीमध्ये घर याचे
शेणाचे असते
पाहुणेरावळे येणार
सांगत कोण बसते?

उत्तर –
१) फुगा
२) आई
३) कावळा

Get latest Marathi News, Maharashtra News and Latest Mumbai News from Politics, Sports, Entertainment, Business and local news from Mumbai and All cities of Maharashtra

RELATED ARTICLES
- Advertisment -

Most Popular

- Advertisment -