दोन कारसह पाच दुचाकींचे नुकसान
पुणे : पुण्यात फातिमा नगर (Pune Fatima Nagar Accident) भागात भीषण अपघात घडला आहे. सांगोला येथून पुण्यातील स्वारगेट एसटी स्टँडकडे जाणार्‍या एसटी बसने सात वाहनांना उडवले असून अपघातात सहा जण जखमी झाले आहेत. धडक बसलेल्या वाहनांमध्ये दोन कारसह पाच दुचाकींचा समावेश आहे. या प्रकरणी पोलिसांनी एसटी बसचालकाला (ST Bus driver) ताब्यात घेतले आहे.
कायमच वर्दळ आणि वाहतूक कोंडी असणार्‍या फातिमानगर येथील काळूबाई मंदिर चौक परिसरात एसटी बसचे ब्रेक अचानक निकामी झाले. त्यामुळे बसने दोन चार चाकी गाड्यांसह पाच दुचाकींना धडक दिली. यात कारचा चक्काचूर झाल्याने मोठे नुकसान झाले. अपघाताच्या वेळी बसमध्ये ३० प्रवासी होते.
या अपघातात मोटारीतील आठ वर्षीय मुलाच्या डोक्याला गंभीर दुखापत झाली आहे. तर, अन्य सहा जण किरकोळ जखमी झाले आहेत. त्यांना तातडीने जवळील रूग्णालयात दाखल करण्यात आले आहे. या अपघातामुळे या मार्गावर मोठी वाहतूक कोंडी झाली होती.
दरम्यान, पोलिसांनी एसटी बसचालक चंद्रशेखर स्वामी (रा. सांगोला) याला ताब्यात घेतले आहे. याबाबत रात्री उशिरापर्यंत वानवडी पोलीस ठाण्यात गुन्हा दाखल करण्याचे काम सुरू होते.