ठाणे (प्रतिनिधी) : कोरोना काळात कितीही संकटे आली तरी न डगमगता कार्यरत राहून सक्षम पिढी घडवणाऱ्या मातृशक्तीचा हा सन्मान आहे, असे गौरवोद्गार आमदार संजय केळकर यांनी काढले. नवरात्रोत्सवानिमित्त ठाणे शहर भारतीय जनता पार्टी, स्लम सेलच्या वतीने विविध क्षेत्रांत उल्लेखनीय सेवा बजावणाऱ्या महिलांचा यथोचित गौरव रविवारी ठाण्यात करण्यात आला. यावेळी आ. केळकर बोलत होते.
कार्यक्रमाचे आयोजक स्लम सेलचे अध्यक्ष कृष्णा भुजबळ यांच्या कल्पकतेचेही आ. केळकर यांनी कौतुक केले, तर हा सोहळा म्हणजे समाजाला वेगळी दिशा देणाऱ्या महिला शक्तीचा सन्मान असल्याचे जिल्हाध्यक्ष आ. निरंजन डावखरे म्हणाले.
रविवारी नवरात्रोत्सवाचे औचित्य साधून भारतीय जनता पार्टी, स्लम सेलच्या वतीने विविध क्षेत्रातील नऊ नवदुर्गांचा सन्मान सोहळा ठाणे पूर्वेकडील सर्वसेवा समिती हॉलमध्ये पार पडला. या कार्यक्रमाला भाजप जिल्हाध्यक्ष आ. निरंजन डावखरे, ज्येष्ठ भाजप नेत्या वीणा भाटिया, प्रदेश सचिव संदीप लेले, नगरसेवक भरत चव्हाण, भाजयुमो अध्यक्ष सारंग मेढेकर, ओबीसी सेल अध्यक्ष सचिन केदारी, मच्छीमार सेल अध्यक्ष अमरिश ठाणेकर, राजेश गाडे, सचिन कुटे, विद्या कदम, उषा पाटील, सिद्धेश पिंगुळकर आणि विकी टिकमाणी आदी उपस्थित होते. याप्रसंगी गृहिणी ते यशस्वी उद्योगिनी जया झाडे, वरिष्ठ पोलीस अधिकारी ममता डिसोझा, चार्टर्ड अकौंटंट सोनाली दळवी, संगणक अभियंता मृणाली खेडकर, महिला कीर्तनकार हभप अर्चना आडके, सिंधी भाषा पुरस्कारकर्त्या कशिष जग्यासी, पत्रकार प्रज्ञा म्हात्रे, संध्या सावंत, वनिता जेठरा आणि गौरी सोनवणे आदी नवदुर्गांचा मान्यवरांच्या हस्ते सन्मानचिन्ह देऊन गौरव करण्यात आला.