नेपाळ : नेपाळची राजधानी काठमांडू (Kathmandu) येथील त्रिभुवन आंतरराष्ट्रीय विमानतळ (Tribhuvan International Airport) येथे सोमवारी मोठी विमान दुर्घटना टळली. लँडिंगच्या वेळी एका आंतरराष्ट्रीय विमानाच्या टायरला अचानक आग लागल्याने काही काळ तणावाचे वातावरण निर्माण झाले होते.

ही घटना तुर्की एअरलाइन्स (Turkish Airlines) च्या TK ७२६ या विमानासोबत घडली. हे विमान इस्तंबूलहून उड्डाण करून काठमांडू विमानतळावर सुरक्षित लँडिंग करत होते. मात्र रनवेवर उतरताच विमानाच्या चाकांमधून धूर आणि ज्वाळा दिसू लागल्या, ज्यामुळे विमानतळावर तात्काळ अलर्ट घोषित करण्यात आला.

https://prahaar.in/2026/05/11/india-pakistan-border-high-alert-high-alert-raised-in-sriganganagar-strict-restrictions-in-place-in-border-areas-till-september-15-2026/

घटना घडताच विमानतळ प्रशासन आणि आपत्कालीन सेवा तत्काळ सक्रिय झाल्या. अग्निशमन दलाच्या गाड्या काही मिनिटांत घटनास्थळी पोहोचल्या आणि परिस्थितीवर नियंत्रण मिळवण्यात यश आले. त्यामुळे आग मोठ्या प्रमाणात पसरण्यापूर्वीच ती विझवण्यात आली.

विमानात एकूण २७८ प्रवासी आणि ११ क्रू मेंबर्स होते. यामध्ये काही संयुक्त राष्ट्र संघाचे (UN) वरिष्ठ अधिकारीही असल्याची माहिती मिळाली आहे. परिस्थिती नियंत्रणात आल्यानंतर सर्व प्रवाशांना सुरक्षितपणे विमानाबाहेर काढण्यात आले.

https://prahaar.in/2026/05/11/rupali-chakankar-rupali-chakankar-was-questioned-for-6-hours-what-did-chakankar-say/

विमानतळ सुरक्षा अधिकाऱ्यांनी दिलेल्या माहितीनुसार, कोणालाही गंभीर दुखापत झाली नसून सर्व प्रवासी आणि कर्मचारी पूर्णपणे सुरक्षित आहेत. सुरक्षा यंत्रणांच्या तत्पर प्रतिसादामुळे मोठा अनर्थ टळला आणि संभाव्य भीषण दुर्घटना टाळण्यात यश आले.

दरम्यान, घटनेनंतर विमानतळ परिसरात काही काळासाठी अतिरिक्त सुरक्षा वाढवण्यात आली होती. अपघाताचे नेमके कारण शोधण्यासाठी तांत्रिक तपासणी सुरू करण्यात आली आहे.