विरार (प्रतिनिधी) : पावसाळ्यामध्ये ग्रामीण भागातील रस्ते वापरण्यायोग्य राहत नाहीत, अशा गाव पाड्यात पक्के रस्ते तयार करुन हे रस्ते मुख्य रस्त्याशी जोडण्यात येणार असल्याचे आदिवासी विकास मंत्री डॉ. विजयकुमार गावित यांनी सांगितले. आरोग्य विभाग, सार्वजनिक बांधकाम विभाग आदि विभागाची आढावा बैठक जिल्हाधिकारी कार्यालयामधील जिल्हा नियोजन समिती सभागृहात घेण्यात आली. त्यानंतर पत्रकार परिषदेचे आयोजन करण्यात आले होते त्यावेळी आदिवासी विकास मंत्री डॉ. विजयकुमार गावित बोलत होते.

यावेळी खासदार राजेंद्र गावित, आमदार श्रीनिवास वनगा, सुनिल भुसारा, जिल्हाधिकारी गोविंद बोडके, आदिवासी विकास आयुक्त हिरालाल सोनावने, सहाय्यक जिल्हाधिकारी अशिमा मित्तल, आयुषी सिंह अतिरिक्त मुख्य कार्यकारी अधिकारी तुषार माळी, निवासी उपजिल्हाधिकारी डॉ. किरण महाजन, तसेच वरीष्ठ अधिकारी उपस्थित होते.

दुर्गम भागातील आरोग्य सेवा अधिक सक्षम करण्यासाठी आरोग्य विभागातील रिक्त पदे लवकरच भरण्यात येतील, दुर्गम भागातील ग्रामस्थामध्ये आरोग्य विषयक जनजागृती व्हावी यासाठी आशा सेविका घरोघरी जाऊन आरोग्याविषयी माहिती देणार आहेत. आदिवासी क्षेत्रातील समस्याचे समुळ उच्चाटन करण्यासाठी संबधित सर्व अधिकाऱ्यांना समन्वयाने काम करणाच्या सुचना दिल्या असल्याचे डॉ. गावित यांनी सांगितले. जल जीवन मिशन योजनेअंतर्गत हर घर जल या उपक्रमामध्ये गाव, पाड्यातील प्रत्येक घरात ५५ लिटर शुध्द पाणी मिळण्यासाठी पाणी शुध्दीकरण प्रकल्प स्थापन करण्यात येईल, असेही डॉ. गावित यांनी सांगितले.

सफाळे (वार्ताहर) : पश्चिम रेल्वेचे डीआरएम जी. सत्यप्रकाश हे एका कार्यक्रमानिमित्त डाहाणू येथे आले असता, रेल्वे प्रवाशांच्यावतीने डहाणूसाठी नवीन लोकल फेरी सुरु करावी, या मागणीचे निवेदन त्यांना देण्यात आले. ते खासदार राजेंद्र गावित यांच्या बरोबर शनिवारी केळवे येथे दौऱ्यावर आले होते.

पश्चिम रेल्वेच्या विरार स्थानकावरून संध्याकाळी ६ ते ७:१० या १ तासापेक्षा अधिकच्या वेळेत डहाणू करीता लोकल उपलब्ध नसल्याने दोन्ही लोकलला मोठ्या प्रमाणात गर्दी होत असते. डहाणू विरार लोकल सेवा सुरू होऊन ९ वर्षाचा काळ उलटला तरी डहाणू विरार लोकल फेऱ्या मध्ये वाढ मात्र झाली नाही. सकाळी मुंबईकडे जाणाऱ्या आणि संध्याकाळी मुंबईकडून डहाणूकडे येणाऱ्या लोकल मध्ये १ तासापेक्षा जास्त अंतर आहे. त्यामुळे गर्दीच्या वेळी विरार डहाणू लोकलला मोठ्या प्रमाणात गर्दी होते. त्यामुळे गर्दीच्या वेळी लोकल फेऱ्या मध्ये वाढ करण्यात यावी, अशी मागणी प्रवासी वर्ग करीत आहे.

त्याअनुषंगाने गर्दीच्या वेळी सकाळी मुंबई कडे जाणाऱ्या आणि संध्याकाळी मुंबई कडून येणाऱ्या लोकल फे-यामध्ये वाढ करण्यात यावी अशी मागणी प्रवाशांच्या वतीने डीआरएम यांच्याकडे करण्यात आली. तसेच पालघर भागातील रेल्वे प्रवाशांच्या मागण्यांचा सहानभूतीपूर्वक विचार करून या भागातील रेल्वे समस्या सोडवण्याची मागणी डीआरयुसीसी सदस्य केदार काळे यांनी डीआरएम आणि खासदार यांच्याकडे केली.

तसेच डहाणू ते वैतरणा रेल्वे स्थानकात असलेल्या विविध समस्या लवकरात लवकर सोडवून प्रवाशांना चांगल्या सोयीसुविधा देण्याची मागणी खासदार गावित यांनी डीआरएम यांच्याकडे यावेळी केली. करोना काळात बंद करण्यात आलेली सकाळची डहाणू – विरार लोकल लवकरच सुरू करण्यात येणार असल्याचे डीआरएम यांनी सांगितले. या प्रसंगी सामाजिक कार्यकर्ते राजा ठाकूर, यतीन सावे आणि प्रवासी उपस्थित होते.

डहाणू : कोरोना महामारी संसर्ग आटोक्यात आला असला तरी, पावसाळ्याच्या दिवसात अन्य संसर्गजन्य आजाराच्या रुग्णसंखेत झपाटाने वाढ होताना दिसत आहे, यात ताप, सर्दी, खोकला, याचे सर्वाधिक रुग्ण निरनिराळ्या खाजगी तसेच सरकारी रुग्णालयात उपचार घेत आहेत.

काही दिवसापासून सतत पाऊस पडत असल्याने, हवेतील दमटपणा कायम राहून, हिवताप, डेंग्यू, गॅस्ट्रो, कावीळ, स्वाईनफ्लू, इत्यादी संसर्गजन्य आजारात वाढ झाली आहे. तापाच्या आजाराने बंदरपट्टी भागातील वरोर, वाढवण, वासगाव, चिंचणी, धाकटीडहाणू, बाडापोखरण, परिसरात अनेक रुग्ण फणफणले आहेत. एका महिन्याभरापूर्वी चिंचणी येथे डेंग्यू चा रुग्ण आढळून आला होता, असे सांगण्यात आले.

सरकारी रुग्णालयापेक्षा खाजगी रुग्णालयात उपचार घेण्याचा रुग्णांचा कल अधिक असल्याने रुग्णाच्या आजाराची नोंद मिळू शकत नाही. त्यातच सणासुदीचा हंगाम सुरू झाल्याने बाजारपेठा गजबजलेल्या आहेत. त्यातच भर म्हणजे काही गरीब लोक कुजलेले मासे सडका भाजीपाला आणि दूषित पाणी पिल्याने संसर्गजन्य आजाराचा फैलाव मोठ्या प्रमाणावर होण्याची भीती आहे.