गर्दीच्या वेळेला प्रवाशांची रखडपट्टी
विरार : सकाळ – संध्याकाळ गर्दीच्या वेळेला पालघर, बोईसर, डहाणू येथे जाणाऱ्या विरार भागातील गरजू नागरिकांची व चाकरमान्यांची रोज वेळेवर गाड्या नसल्याने रखडपट्टी होत आहे. तर काही बांधकाम व्यावसायिक, वकील यांना ट्रेनचा प्रवास टाळून स्वत:च्या खासगी वाहनांनी मुंबई – अहमदाबाद महामार्गावरून लांबचा वळसा घालून पेट्रोल व जादा खर्च करून यावे-जावे लागत आहे.
लोकल ट्रेनला कमालीची गर्दी असते. जाण्यासाठी सकाळी व संध्याकाळी कमीत कमी एक तासाहून अधिक वेळ ट्रेनसाठी थांबावे लागते. गाडीत सामान्य कष्टकरी व मुंबईवरून येणाऱ्या चाकरमान्यांची आधीच गर्दी असते. इतर अधून-मधून जाणाऱ्या प्रवाशांना गाडीत चढणे देखील मुश्किल होते. गाडीचे टाईमटेबल फिक्स नाही. मुख्य म्हणजे रोज कामधंद्याची धावपळ असणाऱ्या नागरिकांना लोकल मेमू व एक्स्प्रेस गाड्यांनी सकाळ – संध्याकाळ गर्दीच्या वेळी प्रवास करावा लागतो. अशावेळी लोकल ट्रेनचे तिकीट एक्स्प्रेस गाडीला चालत नाही. एक्स्प्रेसचे तिकीट वेगळे काढावे लागते.
खासगी वाहनाने बोईसर, पालघर येथून वसई – विरारला येणाऱ्या-जाणाऱ्या प्रवाशांना खड्डे पडलेले रस्ते व मुंबई – अहमदाबाद महामार्ग असलेल्या नादुरुस्त रस्त्याचा खूप त्रास सहन करावा लागतो. आता रस्ते बिघडल्याने अनियमित लोकल ट्रेन व एक्स्प्रेस गाड्यांची सेवा रेल्वेने अधिक देऊन स्थानिक प्रवाशांना न्याय द्यावा, अशी मागणी प्रवासी व नागरिकांमधून केली जात आहे.
Get latest Marathi News, Maharashtra News and Latest Mumbai News from Politics, Sports, Entertainment, Business and local news from Mumbai and All cities of Maharashtra