Jalgaon FDA Raid : जळगाव जिल्ह्यात विनापरवाना सौंदर्य प्रसाधनांची निर्मिती आणि विक्री होत असल्याची माहिती मिळाल्यानंतर अन्न व औषध प्रशासन (Food and Drug Administration) विभागाने अमळनेर आणि जळगाव शहरात कारवाई केलीय. या कारवाईत दोन ठिकाणांहून तब्बल 1 लाख 6 हजार 325 रुपये किमतीचा सौंदर्य प्रसाधनांचा साठा जप्त करण्यात आला आहे. (Jalgaon News)
सौंदर्य प्रसाधनांचा साठा जप्त
अमळनेरच्या रवींद्रनगर परिसरात प्रियदर्शनी रजाळे यांच्या मालकीच्या ठिकाणी पंचांसमक्ष तपासणी करण्यात आली. यावेळी विविध प्रकारची सौंदर्य प्रसाधने आढळून आली. त्यांची एकूण किंमत 72 हजार 392 रुपये असून हा संपूर्ण मुद्देमाल जप्त करण्यात आला. यानंतर जळगाव शहरातील महाबळ परिसरात राशी तळरेजा यांच्या मालकीच्या ठिकाणी तपासणी करण्यात आली. येथे सौंदर्य प्रसाधनांसोबतच त्यांचे पॅकिंग आणि उत्पादनासाठी वापरले जाणारे साहित्यही आढळले. या ठिकाणाहून 33 हजार 933 रुपये किमतीचा मुद्देमाल जप्त करण्यात आला. तपासणीदरम्यान क्रीम, पावडर आणि जेल स्वरूपातील विविध उत्पादने आढळली. काही उत्पादनांवर लेबल होते, तर काही उत्पादने विनालेबल असल्याचे समोर आले. याशिवाय प्रिंटेड लेबल्स, रिकाम्या बरण्या, इलेक्ट्रॉनिक वजनकाटा आणि इतर पॅकिंग साहित्यही जप्त करण्यात आले. (Jalgaon News)
Jalgaon Crime : जळगाव जिल्ह्यातील अमळनेर (Amalner) तालुक्यात एक धक्कादायक घटना समोर आली आहे. गुरुवारी पहाटे एकाच कुटुंबातील पती-पत्नीसह त्यांच्या दोन मुलींचा ...
प्रयोगशाळेचा अहवाल आल्यानंतर कायदेशीर कारवाई
संबंधित ठिकाणी वैध उत्पादन परवाना नसतानाही सौंदर्य प्रसाधनांचा साठा, उत्पादन आणि पॅकिंग केले जात असल्याचे प्रशासनाच्या निदर्शनास आले. काही उत्पादनांची आवश्यक गुणवत्ता तपासणी न करताच विक्री होत असल्याचेही तपासणीत आढळले. त्यामुळे जप्त केलेल्या उत्पादनांच्या गुणवत्तेचीही तपासणी केली जात आहे. जप्त केलेल्या सौंदर्य प्रसाधनांपैकी काही नमुने अधिकृत प्रयोगशाळेत पाठविण्यात आले आहेत. या नमुन्यांमधील घटक, उत्पादनाची गुणवत्ता आणि नियमांचे पालन झाले आहे की नाही, याची तपासणी केली जाणार आहे. प्रयोगशाळेचा अहवाल आल्यानंतर संबंधितांवर नियमानुसार पुढील कायदेशीर कारवाई केली जाणार आहे. (Jalgaon News)
सौंदर्य प्रसाधने खरेदी करताना काळजी घ्या
ही कारवाई जिल्ह्याचे सहायक आयुक्त (औषधे) डॉ. प्र. भा. अस्वार यांच्या नेतृत्वाखाली क. र. पाटील आणि अन्न व औषध प्रशासनाच्या पथकाने केली.दरम्यान, नागरिकांनी सौंदर्य प्रसाधने खरेदी करताना विशेष काळजी घेण्याचे आवाहन अन्न व औषध प्रशासनकडून करण्यात आले आहे. उत्पादनाच्या लेबलवर उत्पादकाचे नाव व पत्ता, परवाना क्रमांक, बॅच क्रमांक, उत्पादनाची तारीख आणि मुदतबाह्यता तारीख यांसारखी आवश्यक माहिती आहे की नाही, हे तपासावे. विनालेबल किंवा अस्पष्ट माहिती असलेली उत्पादने खरेदी करू नयेत, असे प्रशासनाने स्पष्ट केले आहे.
