पुणे : पुणे रेल्वे विभागाकडून पुणे यार्डातील ट्रॅक आणि सिग्नल यंत्रणेच्या आधुनिकीकरणाचे काम हाती घेण्यात आले आहे. या कामासाठी रविवारी, 23 ऑगस्ट रोजी सकाळी 8 ते सायंकाळी 5 वाजेपर्यंत तब्बल 9 तासांचा विशेष पायाभूत सुविधा ब्लॉक घेण्यात येणार आहे. त्यामुळे रविवारी रेल्वेने प्रवास करणाऱ्या प्रवाशांना काही अडचणींचा सामना करावा लागू शकतो. या ब्लॉकदरम्यान काही गाड्या रद्द करण्यात आल्या असून, काही गाड्यांच्या अंतिम स्थानकात बदल करण्यात आला आहे. (Pune Railway)
23 ऑगस्ट रोजी मुंबई-पुणे-मुंबई डेक्कन एक्स्प्रेस, दौंड-पुणे डेमू आणि सातारा-पुणे डेमू या गाड्यांच्या फेऱ्या रद्द करण्यात आल्या आहेत. त्यामुळे या गाड्यांमधून प्रवास करणाऱ्या प्रवाशांनी पर्यायी वाहतुकीचे नियोजन करणे आवश्यक आहे. (Pune Megablock)
काही लांब पल्ल्याच्या गाड्यांना पुणे स्थानकाऐवजी पर्यायी स्थानकांवर थांबवण्यात येणार आहे. जयपूर-पुणे एक्स्प्रेस आणि मुंबई-पुणे प्रगती एक्स्प्रेस या गाड्या पुण्याऐवजी खडकी स्थानकापर्यंत धावतील. तेथूनच त्यांचा पुढील प्रवास सुरू होईल. (Pune Railway News)
नागपूर एक्स्प्रेस, जम्मू तावी एक्स्प्रेस आणि अमरावती एक्स्प्रेस या गाड्या पुणे स्थानकाऐवजी हडपसरपर्यंत धावणार आहेत. हडपसर स्थानकावरूनच या गाड्यांचा पुढील प्रवास सुरू होईल. (Pune Yard)
पुणे-कोल्हापूर गाडी पुण्याऐवजी सातारा स्थानकातून रवाना होणार आहे. तसेच बारामती डेमू दौंड स्थानकापर्यंतच धावणार असून, तेथेच तिची सेवा थांबवण्यात येणार आहे. (Pune Train Cancelled)
या मेगाब्लॉकचा परिणाम लोकल सेवेवरही होणार आहे. लोणावळा-तळेगाव मार्गावरील लोकल गाड्या शिवाजीनगर स्थानकापर्यंतच चालवल्या जातील. तसेच लोणावळ्याच्या दिशेने जाणारी लोकल शिवाजीनगर स्थानकातूनच रवाना होईल. (Pune Local)
रेल्वे प्रशासनाकडून प्रवाशांना रविवारी प्रवासाचे नियोजन करण्यापूर्वी संबंधित गाडीचे सुधारित वेळापत्रक आणि सेवा स्थिती तपासण्याचे आवाहन करण्यात आले आहे. अचानक होणारी गैरसोय टाळण्यासाठी प्रवाशांनी वेळेचे योग्य नियोजन करूनच घराबाहेर पडावे. (Local Train News)
