पुणे बसस्थानकावर महिलेला हार्ट अटॅक; महिला कंडक्टर बनली देवदूत
पुणे: पुण्यातील मध्यवर्ती एसटी बसस्थानकावर एक महिला प्रवासी अचानक बेशुद्ध पडल्याने काही काळ गोंधळाचे वातावरण निर्माण झाले. मात्र, एसटीच्या महिला वाहकाने प्रसंगावधान राखत वेळेत CPR (कार्डिओ पल्मोनरी रिससिटेशन) दिल्यामुळे महिलेचा जीव वाचला. या धाडसी आणि तत्पर कृतीबद्दल संबंधित कर्मचाऱ्यांचे सर्व स्तरांतून कौतुक होत आहे. (Pune)
मिळालेल्या माहितीनुसार, अरुणा सुनील जैन या छत्रपती संभाजीनगर येथून मालेगावला जाण्यासाठी पुण्यातील मध्यवर्ती बसस्थानकावर आल्या होत्या. बसची वाट पाहत असताना त्यांना अचानक छातीत तीव्र वेदना सुरू झाल्या. काही क्षणांतच त्यांची प्रकृती गंभीर झाली आणि त्या कोसळल्या. (Heart Attack)
घटना लक्षात येताच तेथे उपस्थित असलेल्या महिला वाहक संगीता पालवे यांनी क्षणाचाही विलंब न करता मदतीसाठी धाव घेतली. हृदयविकाराचा झटका आल्याची शक्यता ओळखून त्यांनी तातडीने महिलेवर CPR सुरू केला. त्यांच्या वेळेवर केलेल्या प्रयत्नांमुळे महिलेच्या हृदयाचे ठोके पुन्हा सुरू होण्यास मदत झाली. (ST Bus)
दरम्यान, इतर एसटी कर्मचाऱ्यांनीही घटनास्थळी धाव घेत परिस्थिती नियंत्रणात आणली. 108 रुग्णवाहिका सेवेशी संपर्क साधण्यात आला. मात्र, रुग्णवाहिका वेळेत उपलब्ध न झाल्याने कर्मचाऱ्यांनी तातडीचा निर्णय घेत महिलेला रिक्षामधून शासकीय वैद्यकीय महाविद्यालय आणि रुग्णालयात दाखल केले. ( Women Heart Attack)
रुग्णालयात डॉक्टरांनी त्वरित उपचार सुरू केले. वेळेवर CPR मिळाल्यामुळे आणि तत्काळ वैद्यकीय उपचार झाल्याने महिलेचा जीव वाचल्याची माहिती डॉक्टरांनी दिली. (Pune Bus Stand)
या संपूर्ण घटनेत सहायक वाहतूक निरीक्षक बाबासाहेब साळुंके, महिला वाहक संगीता पालवे, सुरक्षा रक्षक कविता भुतेकर आणि रवींद्र गरड यांनी महत्त्वाची भूमिका बजावली. सर्वांनी समन्वयाने आणि शांतपणे परिस्थिती हाताळल्यामुळे मोठा अनर्थ टळला. (Viral Video)
या घटनेमुळे आपत्कालीन परिस्थितीत CPR चे महत्त्व पुन्हा एकदा अधोरेखित झाले आहे. योग्य वेळी दिलेला प्रथमोपचार आणि प्रसंगावधान यामुळे अनेकांचे प्राण वाचू शकतात, हे या घटनेतून स्पष्ट झाले. एसटी कर्मचाऱ्यांच्या या मानवतावादी कार्याचे प्रवासी आणि नागरिकांकडून कौतुक केले जात आहे.
