Nashik Fire : नाशिकमध्ये अग्नितांडव! भाभानगरातील ऑईल गोदामाला आग; १० बंबांच्या मदतीने आगीवर नियंत्रण

नाशिक : मुंबई नाका परिसरातील भाभानगर येथील एका ऑईल गोदामाला सोमवारी रात्री भीषण आग लागल्याने परिसरात एकच खळबळ उडाली. ज्वलनशील पदार्थांचा मोठा साठा असल्याने आगीने काही क्षणांतच रौद्र रूप धारण केले आणि परिसरात धुराचे प्रचंड लोट पसरले. (Nashik Fire)

मिळालेल्या माहितीनुसार, दादासाहेब गायकवाड सभागृहाच्या मागील बाजूस असलेल्या अकरा ट्रान्सपोर्ट आणि जंटकी ट्रान्सपोर्टच्या गोदामात ही आग लागली. आगीची माहिती मिळताच अग्निशमन दलाच्या तब्बल १० गाड्या घटनास्थळी दाखल झाल्या. जवानांनी युद्धपातळीवर प्रयत्न करत आग आटोक्यात आणण्यासाठी शर्थीचे प्रयत्न केले. (Nashik Fire)

आगीची तीव्रता लक्षात घेता परिसरातील नागरिकांना सुरक्षित स्थळी हलविण्यात आले. तसेच पोलिसांनी परिसरात बंदोबस्त वाढवत नागरिकांना घटनास्थळापासून दूर ठेवले. अग्निशमन दलाच्या तातडीच्या कारवाईमुळे आग आजूबाजूच्या इमारती आणि परिसरात पसरण्यापासून रोखण्यात यश आले. (Nashik Fire)

या आगीत गोदामातील मोठ्या प्रमाणावरील माल जळून खाक झाला असून मोठे आर्थिक नुकसान झाल्याचा प्राथमिक अंदाज व्यक्त करण्यात येत आहे. मात्र रात्री उशिरापर्यंत कोणतीही जीवितहानी झाल्याची माहिती समोर आलेली नव्हती. आग लागण्याचे नेमके कारण अद्याप स्पष्ट झाले नसून ऑईल साठवणुकीच्या ठिकाणी शॉर्टसर्किट किंवा अन्य तांत्रिक कारणामुळे आग लागली असावी, असा प्राथमिक अंदाज वर्तविण्यात येत आहे. संबंधित यंत्रणांकडून घटनेचा सखोल तपास सुरू करण्यात आला आहे. (Nashik Fire)

घटनेची माहिती मिळताच परिसरातील नागरिकांनी मोठी गर्दी केली होती. आगीमुळे काही काळ परिसरात भीतीचे वातावरण निर्माण झाले होते. प्रशासनाने नागरिकांना अफवांवर विश्वास न ठेवण्याचे आणि सुरक्षेच्या सूचनांचे पालन करण्याचे आवाहन केले आहे. आग पूर्णपणे विझल्यानंतरच नुकसानीचा नेमका आकडा समोर येणार असून तपासानंतर आगीचे खरे कारण स्पष्ट होणार आहे. (Nashik Fire)