Himachal Accident : हिमाचलमध्ये भीषण दुर्घटना! छत्तीसगडच्या पर्यटकांची कार ५०० फूट दरीत कोसळली; ८ जणांच्या मृत्यूची भीती

शिमला : हिमाचल प्रदेशातील चंबा जिल्ह्यात एक हृदयद्रावक अपघात घडला असून छत्तीसगडमधील पर्यटकांना घेऊन जाणारी कार खोल दरीत कोसळल्याने आठ जणांचा मृत्यू झाल्याची भीती व्यक्त केली जात आहे. चुराह उपविभागातील बैरागढ-साच पास-किलाड मार्गावर गुरुवारी (२९ मे) मध्यरात्री ही दुर्घटना घडली. अपघातानंतर वाहनातील सर्वजण बेपत्ता असून दुर्गम भागामुळे बचावकार्य मोठ्या अडचणींमध्ये सुरू आहे. (Himachal Accident)

पर्यटन सहल ठरली अखेरची यात्रा :

पोलिसांनी दिलेल्या माहितीनुसार, छत्तीसगडमधील दोन कुटुंबांतील सात सदस्य हिमाचल प्रदेशात पर्यटनासाठी आले होते. ते डलहौजी येथील एका हॉटेलमध्ये वास्तव्यास होते. २९ मे रोजी त्यांनी प्रसिद्ध साच पास परिसरात फिरण्यासाठी प्रस्थान केले होते. संध्याकाळपर्यंत हॉटेलमध्ये परतण्याचे नियोजन असतानाही ते परतले नाहीत. त्यांच्या मोबाईलवर संपर्क होत नसल्याने हॉटेल व्यवस्थापनाने पोलिसांना माहिती दिली आणि त्यानंतर शोधमोहीम सुरू करण्यात आली. (Himachal Accident)

शोधमोहीमेत समोर आले भीषण वास्तव :

तपासादरम्यान पर्यटकांची एर्टिगा कार (HP 01 C 2133) बैरागढ-साच पास-किलाड मार्गावर खोल दरीत कोसळल्याचे उघड झाले. अपघात इतका भीषण होता की वाहनाचे अक्षरशः तुकडे झाले आहेत. वाहन अनेकशे फूट खोल दरीत पडल्याने त्यातील प्रवाशांच्या बचावाची शक्यता अत्यंत कमी असल्याचे प्रशासनाने सांगितले आहे. (Himachal Accident)

दुर्घटनास्थळ अत्यंत दुर्गम आणि डोंगराळ भागात असल्याने पोलीस, आपत्ती व्यवस्थापन पथक आणि स्थानिक बचाव पथकांना घटनास्थळी पोहोचण्यासाठी मोठी कसरत करावी लागत आहे. (Himachal Accident)

कारमध्ये कोण होते?

अपघातग्रस्त वाहनात छत्तीसगडमधील अरविंद, त्यांची पत्नी प्राची, त्यांचे दोन मुलगे दर्श आणि अपशद, पी. जी. कार्तिगहेयन, त्यांची पत्नी मणिमाला, त्यांचा मुलगा नंदन तसेच स्थानिक चालक विश्वास असे एकूण आठ जण प्रवास करत होते. चालक विश्वास हा डलहौजी परिसरातील रहिवासी असल्याची माहिती आहे. (Himachal Accident)

पोलीस अधीक्षक स्वतः घटनास्थळी :

चंबाचे पोलीस अधीक्षक विजय सकलानी यांनी सांगितले की, अपघाताची माहिती मिळताच तातडीने पोलीस आणि बचाव पथके रवाना करण्यात आली. दुर्घटनास्थळ दुर्गम असल्यामुळे मदतकार्याला विलंब होत असला तरी सर्व यंत्रणा युद्धपातळीवर काम करत आहेत. सकलानी हे स्वतःही घटनास्थळाकडे रवाना झाले असून परिस्थितीवर लक्ष ठेवून आहेत. (Himachal Accident)

महिनाभरात दुसरी मोठी दुर्घटना :

विशेष म्हणजे, चंबा जिल्ह्यात पर्यटकांशी संबंधित हा महिन्यातील दुसरा मोठा अपघात आहे. यापूर्वी १० मे रोजी ककीरा-लाहडू मार्गावर गुजरातमधील पर्यटकांची इनोव्हा कार पावसामुळे अनियंत्रित होऊन खोल दरीत कोसळली होती. त्या भीषण अपघातात सहा जणांचा जागीच मृत्यू झाला होता, तर चार जण गंभीर जखमी झाले होते. (Himachal Accident)

हिमाचल प्रदेशातील निसर्गरम्य पण धोकादायक डोंगररस्त्यांवर वारंवार घडणाऱ्या अपघातांमुळे पर्यटकांच्या सुरक्षेचा प्रश्न पुन्हा एकदा ऐरणीवर आला आहे. सध्या संपूर्ण परिसरात शोध आणि बचावकार्य सुरू असून प्रशासनाकडून पुढील माहितीची प्रतीक्षा आहे. (Himachal Accident)