पुणे : पुण्यातील नसरापूरमध्ये घडलेल्या साडेतीन वर्षांच्या चिमुरडीवरील अमानुष अत्याचार आणि निर्घृण हत्येच्या घटनेने संपूर्ण महाराष्ट्र केवळ हादरलाच नाही, तर संताप व्यक्त करत रस्त्यावर उतरला आहे. माणुसकीला काळिमा फासणाऱ्या या कृत्यामुळे जनमानसात तीव्र संतापाची लाट असतानाच, या खटल्याला आता एक अत्यंत वेगळे आणि महत्त्वाचे वळण मिळाले आहे. या प्रकरणातील मुख्य आरोपी, ६५ वर्षीय भीमराव कांबळे याच्या विरोधात आता खुद्द त्याचे रक्ताचे नातेवाईकच ढाल बनून उभे राहिले आहेत. आरोपीच्या पत्नीने आणि मुलाने त्याच्या कृत्याचा जाहीर निषेध करत त्याच्याशी असलेले सर्व संबंध तोडून टाकले आहेत. स्वतःच्याच कुटुंबीयांनी आरोपीच्या विरोधात घेतलेली ही आक्रमक आणि न्याय्य भूमिका या संपूर्ण कायदेशीर लढाईत 'मैलाचा दगड' ठरणार असून, नराधमाला फासापर्यंत नेण्यासाठी हा सर्वात मोठा पुरावा मानला जात आहे.
'त्याला जिवंत ठेवू नका'; पत्नी आणि मुलाचा संताप
आरोपी भीमराव कांबळे याने केलेल्या घृणास्पद कृत्यानंतर त्याच्या कुटुंबाने त्याच्याशी असलेले सर्व नाते नाकारले आहे. "ज्या नराधमाने एका निष्पाप जिवाचा असा छळ केला, त्याला समाजात जगण्याचा कोणताही अधिकार नाही. त्याला दगडाने ठेचून मारले पाहिजे किंवा फासावर लटकवले पाहिजे," अशी संतप्त भावना त्याच्या पत्नीने व्यक्त केली आहे. आरोपीच्या मुलानेही आपल्या वडिलांच्या कृत्याचा निषेध करत, त्यांना कठोरात कठोर शासन व्हावे, अशी मागणी प्रशासनाकडे केली आहे.
Kalita Majhi : दुसऱ्यांच्या घरात धुणी भांडी करणारी महिला थेट आमदार; कलिता माझी यांची बंगालच्या निवडणुकीत मोठी झेप
पश्चिम बंगाल (West Bangal Election 2026) विधानसभा निवडणूक २०२६ चे निकाल नुकतेच जाहीर झाले असून, राज्याच्या राजकीय इतिहासात मोठी उलथापालथ पाहायला मिळाली. भारतीय जनता ...
कौटुंबिक साक्ष ठरणार 'भक्कम पुरावा'
या प्रकरणाचा तपास करत असताना पुणे ग्रामीण पोलिसांनी एक महत्त्वपूर्ण निर्णय घेतला आहे. आरोपीच्या कुटुंबीयांनी माध्यमांसमोर दिलेली प्रतिक्रिया आणि त्यांची आक्रमक भूमिका आता पोलीस न्यायालयात पुरावा म्हणून सादर करणार आहेत. जेव्हा रक्ताची नातीच आरोपीच्या विरोधात साक्ष देतात, तेव्हा गुन्ह्याचे गांभीर्य अधिक स्पष्ट होते. कौटुंबिक स्तरावर असलेला हा तीव्र विरोध आरोपीला शिक्षा मिळवून देण्यासाठी कायदेशीरदृष्ट्या पोलिसांची बाजू भक्कम करणार आहे. "त्या चिमुरडीच्या आत्म्याला काय यातना झाल्या असतील? तिच्या आईच्या दुःखाची कल्पनाही करवत नाही. माझ्या पतीला त्याच गोठ्यात शिक्षा द्या जिथे त्याने हे कृत्य केले." आरोपीची पत्नी
दहा वर्षांपासून तुटलेले संबंध
आरोपीच्या मुलाने दिलेल्या माहितीनुसार, भीमराव कांबळे हा विकृत मानसिकतेचा असून १० वर्षांपूर्वी त्याने स्वतःच्या पुतणीवरही अत्याचार केला होता. त्या घटनेनंतर कुटुंबाने त्याच्याशी असलेले सर्व संबंध तोडून टाकले होते आणि ते वेगळे राहत होते. "अशा व्यक्तीला आमचा बाप म्हणवून घेताना आम्हाला लाज वाटते," अशा शब्दांत मुलाने आपल्या भावना व्यक्त केल्या असून पीडित बालिकेला लवकरात लवकर न्याय मिळण्याची अपेक्षा व्यक्त केली आहे.
न्यायालयीन प्रक्रियेत काय होणार?
पुणे पोलीस आता या प्रकरणाचा तपास जलदगतीने पूर्ण करत असून, कुटुंबीयांचे जबाब आणि त्यांनी व्यक्त केलेला निषेध 'डाईंग डिक्लेरेशन' किंवा 'परिस्थितीजन्य पुराव्यांच्या' धर्तीवर न्यायालयात मांडले जाण्याची शक्यता आहे. यामुळे आरोपीला कोणत्याही परिस्थितीत सवलत मिळणार नाही, याची खात्री पोलीस प्रशासन करत आहे.
