मुंबई : जळगाव जिल्ह्यातील भुसावळ नगरपरिषदेच्या राष्ट्रवादी काँग्रेस (शरद पवार गट) च्या थेट निवडून आलेल्या नगराध्यक्षा गायत्री रुपचंद गौर ऊर्फ गायत्री चेतन भंगाळे यांचे जातवैधता प्रमाणपत्र अवैध ठरवण्यात आले आहे. त्यामुळे त्यांची नगराध्यक्ष आणि नगरसेवकपदाची निवड भूतलक्षी प्रभावाने रद्दबातल ठरविण्यात आली आहे. नगर विकास विभागाने सोमवारी याबाबतचा अधिकृत शासन आदेश जारी केला आहे.
निवड रद्द होण्याचे कारण काय ?
गायत्री भंगाळे यांनी अनुसूचित जाती (एससी) प्रवर्गातून निवडणूक लढविताना सादर केलेले जात प्रमाणपत्र जळगाव येथील जिल्हा जात प्रमाणपत्र पडताळणी समितीने अवैध ठरवले होते. त्यानंतर जळगावच्या जिल्हाधिकाऱ्यांनी महाराष्ट्र नगरपरिषदा, नगरपंचायती व औद्योगिक नगरी अधिनियम १९६५ चे कलम १६ (१क) व (ब) नुसार कायदेशीर कारवाईचा प्रस्ताव राज्य शासनाला सादर केला होता.
या प्रस्तावाच्या अनुषंगाने २३ एप्रिल २०२६ रोजीच्या जात पडताळणी समितीच्या आदेशानुसार भंगाळे यांची नगराध्यक्षपदाची निवड २३ एप्रिल २०२६ पासून भूतलक्षी प्रभावाने रद्दबातल ठरविण्यात आली आहे. या निर्णयानुसार गायत्री भंगाळे यांना भुसावळ नगरपरिषदेच्या नगरसेवक आणि नगराध्यक्ष पदासाठी अपात्र ठरविण्यात आले आहे.
