मुंबई : कोकण रेल्वेच्या काही गाड्यांच्या आणि सीएसएमटी- हुजूर साहेब नांदेड 'वंदे भारत'च्या वेळेत बदल करण्यात आला आहे. प्रवाशांनी या बदलांची नोंद घेऊन प्रवासाचे नियोजन करावे, असे आवाहन रेल्वे प्रशासनाने केले आहे.
कोकण रेल्वेच्या काही गाड्यांच्या वेळेत बदल : मडगाव जिल्ह्यातील रावणफोंड येथे पुलाच्या बांधकामासाठी कंपोझिट गर्डर टाकण्याकरिता मंगळवार (२१ एप्रिल) ते २४ एप्रिल दरम्यान ट्रॅफिक ब्लॉक आणि पॉवर ब्लॉक घेण्यात येणार आहे. मंगळवारी गाडी क्र. २०६४६ मंगळूरू सेंट्रल - मडगाव जंक्शन वंदे भारत एक्सप्रेस बल्ली स्थानकावर १० मिनिटांसाठी थांबवण्यात येईल. बुधवारी (२२ एप्रिल) गाडी क्र. १२६१९ लो.टि.टर्मिनस- मंगळूरू सेंट्रल एक्सप्रेस मडगाव जंक्शन स्थानकावर २० मिनिटांसाठी थांबवण्यात येईल. गाडी क्र. २०९३२ इंदूर - तिरुवनंतपुरम नॉर्थ एक्सप्रेस मडगाव जंक्शन स्थानकावर ३५ मिनिटांसाठी थांबवण्यात येईल. गुरूवारी २३ एप्रिल गाडी क्र. १६३३८ एर्नाकुलम जंक्शन- ओखा एक्सप्रेस बल्ली स्थानकावर २० मिनिटांसाठी थांबवण्यात येईल, असे कोकण रेल्वेतर्फे कळवण्यात आले आहे.
सीएसएमटी- हुजूर साहेब नांदेड 'वंदे भारत'च्या वेळेत बदल : मध्य रेल्वेने गाडी क्रमांक २०७०५/२०७०६ सीएसएमटी- हुजूर साहेब नांदेड ते सीएसएमटी 'वंदे भारत एक्सप्रेस'च्या वेळेत बदल केला आहे. सुधारित वेळा ३ मे २०२६ पासून लागू होतील. ही गाडी सीएसएमटी, दादर, संभाजी नगर, जालना, परभणी, हुजूर साहेब नांदेड येथे थांबेल तसेच हुजूर साहेब नांदेडहून पुन्हा सीएसएमटी असा प्रवास करेल. ठाणे, कल्याण, नाशिक आणि मनमाड येथे वेळेत कोणताही बदल होणार नाही. गाडी क्रमांक १२१४२ पाटलीपुत्र ही गाडी लो.टि.टर्मिनस स्थानकावर दुपारी २:१० ऐवजी २:२० वाजता पोहोचेल. गाडी क्रमांक २२१८०एम. जी. रामचंद्रन चेन्नई ही गाडी लो. टि. टर्मिनस येथे दुपारी २:२५ ऐवजी २:३० वाजता पोहोचेल. गाडी क्रमांक ११०१२ धुळे -सीएसएमटी एक्सप्रेस सीएसएमटी येथे २.१५ ऐवजी २.२५ ला पोहोचेल.
