मुंबई (सचिन धानजी) : मुंबई महापालिकेत भाजप आणि शिवसेना महायुतीने एकत्रपणे गट तयार करण्याची रणनिती सुरु असतानाच शिवसेनेने भाजपसोबत एकत्रपणे गटनोंदणी न करता स्वतंत्रपणे नोंदणी करतानाच सभागृहातील एक स्वीकृत नगरसेवक आणि समित्यांमधील एक सदस्य संख्या वाढवून घेतली. शिवसेनेने भाजपसोबतच्या गटनोंदणीची प्रक्रिया न मानता दोन्ही राष्ट्रवादी काँग्रेसला सोबत घेण्याचा करिष्मा दाखवला आहे. दोन्ही राष्ट्रवादी काँग्रेसच्या नगरसेवकांसह शिवसेनेने एकत्रपणे गटनोंदणी केल्याचे प्रमाणपत्रच महापालिकेला प्राप्त केले आहे. यामुळे सभागृहातील एमआयएमचा एक वाढला जाणारा स्वीकृत नगरसेवक कमी होत असून तो शिवसेनेच्या वाट्याला जात आहे. तसेच समित्यांमध्येही शिवसेनेचाही एक सदस्य वाढत आहे. अर्थात शिवसेनेने हा करिष्मा केला आहे तो माजी खासदार राहुल शेवाळे आणि गटनेते अमेय घोले यांच्या चाणक्यनितीने. महापालिकेत शिवसेनेसाठी हे दोन्ही नेते चाणक्य ठरलेले पहायला मिळत आहे.
मुंबई महापालिकेत भाजपचे ८९ आणि शिवसेनेचे २९ नगरसेवक निवडून आल्यानंतर सभागृहांमध्ये भाजपच्या वाट्याला ४, उबाठाच्या वाट्याला ३, शिवसेनेच्या वाट्याला १, काँग्रेसच्या वाट्याला १ आणि एमआयएमच्या वाट्याला १ अशाप्रकारे स्वीकृत नगरसेवकांचा कोटा होता. परंतु राष्ट्रवादी काँग्रेसचे तीन आणि राष्ट्रवादी काँग्रेस (शप)चा एक अशाप्रकारे चारही नगरसेवकांना आपल्या गळाला लावून त्यांचा पाठिंबा शिवसेनेने मिळवला आणि आता त्यांना आपल्या गटात सामील करत आपला कोटाही वाढवला. दोन्ही राष्ट्रवादी काँग्रेसच्या चारही नगरसेवकांचा पाठिंबा मिळवत शिवसेनेने आपला गट बनवल्यामुळे महापालिका सभागृहातील शिवसेनेचा कोटा वाढला आणि जिथे त्यांचा एक स्वीकृत नगरसेवक जाणार होता, तिथे आता त्यांचे दोन सदस्य जाणार आहेत. हा स्वीकृत नगरसेवक एमआयएमचा होणार होता, तो आता शिवसेनेच्या वाट्याला येणार आहे.
एवढेच नाही तर स्थायी समिती, शिक्षण समिती, सुधार समिती तसेच बेस्ट समितीसह विशेष समित्यांमध्ये शिवसेनेची सदस्य संख्या एकने वाढली आहे. मात्र, ही संख्या वाढल्यामुळे उबाठाची सदस्य संख्या एकनेही कमी होत आहे. त्यामुळे स्वीकृत नगरसेवकांमध्ये एमआयएमच्या वाट्याला जाणारा एक नगरसेवक आणि समित्यांमध्ये उबाठाचा प्रत्येक एक सदस्य कमी करण्याची रणनिती शिवसेनेचे माजी खासदार राहुल शेवाळे आणि त्यांचे गटनेते अमेय घोले यांनी आखली होती. त्याला अखेर यश आले असून दोन्ही काँग्रेसच्या नगरसेवकांचा एकत्रपणे शिवसेनेसोबत गटनोंदणीचे पत्रच कोकण विभागीय आयुक्तांकडून महापालिका सचिवांना पाठवण्यात आले आहे. त्यामुळे अखेर यावर शिक्कामोर्तब झाल्यामुळे शिवसेनेचे सभागृहात दोन स्वीकृत नगरसेवक जाणार आहेत. तर समित्यांमध्ये एक सदस्य वाढला जाणार आहे. त्यामुळे स्वीकृत नगरसेवकपदी राष्ट्रवादी काँग्रेसमधील कुणाची वर्णी लावून समित्यांमधील सदस्य शिवसेना आपल्याकडे घेते का? की स्वीकृत नगरसेवक आपल्याकडे घेवून समित्यांवर राष्ट्रवादी काँग्रेसच्या नगरसेवकांना सामावून घेतले जाते का याकडे सर्वांचे लक्ष असेल.