नवी मुंबई : नवी मुंबईतील सीवूड्स परिसरात दिवसाढवळ्या घडलेल्या सशस्त्र दरोड्याच्या घटनेमुळे एकच खळबळ उडाली आहे. सीवूड्स सेक्टर ४२ए येथील नीलकंठ प्राईड इमारतीत असलेल्या संगम गोल्ड या सोन्याच्या दुकानावर चार अज्ञात दरोडेखोरांनी बंदुकीचा धाक दाखवत दरोडा टाकल्याची धक्कादायक घटना उघडकीस आली आहे. सुरक्षित मानल्या जाणाऱ्या या परिसरात घडलेल्या प्रकारामुळे व्यापारी वर्गासह नागरिकांमध्ये भीतीचे वातावरण पसरले आहे.
मिळालेल्या माहितीनुसार, दरोडेखोरांनी आधी दुकानाची रेकी केल्याचे प्राथमिक तपासात समोर आले आहे. त्यानंतर ठरवलेल्या योजनेनुसार चार आरोपी घटनास्थळी दाखल झाले. त्यापैकी तीन आरोपी बुरखा परिधान करून थेट दुकानात शिरले, तर चौथा आरोपी बाहेर थांबून परिसरावर नजर ठेवत होता.
दुकानात प्रवेश करताच आरोपींनी कर्मचारी आणि ग्राहकांना बंदुकीचा धाक दाखवत गोंधळ उडवला. काही क्षणांतच त्यांनी दुकानातील सोन्याचे दागिने जबरदस्तीने काढून घेतले. अवघ्या काही मिनिटांतच अत्यंत नियोजनबद्ध पद्धतीने दरोडा टाकून आरोपी घटनास्थळावरून फरार झाले. दरोडेखोर निघून गेल्यानंतर दुकानातील कर्मचारी आणि उपस्थित नागरिकांनी सुटकेचा श्वास सोडला. घटनेची माहिती मिळताच परिसरात एकच गोंधळ उडाला. नवी मुंबई पोलिसांनी तात्काळ घटनास्थळी धाव घेतली असून परिसराची पाहणी करण्यात आली आहे.
तपासासाठी डॉग स्क्वॉडला पाचारण करण्यात आले असून, आसपासच्या परिसरातील सीसीटीव्ही कॅमेऱ्यांचे फुटेज तपासले जात आहे. आरोपींच्या हालचालींचा माग काढण्यासाठी पोलिसांनी विशेष तपास पथके तयार केली असून सर्व बाजूंनी तपास सुरू आहे.
सीवूड्ससारख्या गजबजलेल्या आणि उच्चभ्रू भागात भरदिवसा सशस्त्र दरोडा पडल्याने नागरिकांच्या सुरक्षेचा मुद्दा पुन्हा ऐरणीवर आला आहे. व्यापारी वर्गाकडून पोलिसांनी सुरक्षा व्यवस्था अधिक कडक करावी आणि नियमित गस्त वाढवावी, अशी मागणी करण्यात येत आहे. या प्रकरणातील आरोपींचा लवकरच शोध घेऊन त्यांना अटक केली जाईल, असा विश्वास पोलिसांनी व्यक्त केला असून या घटनेमुळे संपूर्ण नवी मुंबईत खळबळ उडाली आहे.