नवी दिल्ली : प्रत्येक माणसाच्या आयुष्यात आलेला आनंदाचा क्षण कधी दुःखात आणि संकटात बदलेल हे सांगता येत नाही . एका पुरुषासोबत असंच झालं आहे. एक ३६ वर्षांचा पुरुष नेहमीप्रमाणे सकाळी उठला आणि दिवसाची सुरुवात करू लागला. घरातलं अन्न संपलंय त्यामुळे खाण्यासाठी काहीतरी विकत आणा असे पत्नीने त्याला सांगितले. यावर पतीने उत्तर दिले की, आठवडा झाला माझ्याकडे काम नाही... खिशात पैसा नाही...
यावर पत्नीने त्याला उत्तर दिले की, “ सीएसपी सेंटरमध्ये जा आणि तुमचं अकाउंट चेक करा . त्यात काही पैसे असतील. ते काढून रेशन घेऊन या .” पत्नीने सांगितल्याप्रमाणे पती बँकेत गेला. बँकेत जाऊन त्याने तिथल्या स्टाफला खात्यात किती शिल्लक आहे ते विचारले. पुढे म्हणाला... ५०० असतील तर २०० द्या. बँक कर्मचाऱ्याने तपासले तर संबंधित व्यक्तीच्या खात्यात ६०० कोटी रुपये जमा होते. हे पाहताच बँक कर्मचाऱ्याला धक्काच बसला, तो व्यक्ती सुद्धा हैराण झाला .
ही घटना बिहारमधील बक्सर जिल्ह्यातील राजपूर या गावात घडली आहे आणि पुरुषाचं नाव जितेंद्र साह असं आहे. खात्यात ६०० कोटी आहेत हे कळल्यानंतर जितेंद्र बँक कर्मचाऱ्याला म्हणाला, ‘साहेब 200 रुपये तरी द्या..’ यावर सीएसपी सेंटरचा कर्मचारी म्हणाला, ” जर मी तुला एक रुपयाही दिला तर माझी नोकरी जाईल. तुझ्यावर कारवाई होऊ शकते. आम्हाला याबद्दल पोलिसांना कळवावं लागेल.” त्यानंतर पुढच्या २० मिनिटांत त्याचं खातं फ्रिझ केलं जातं.
बँक मॅनेजर आणि पोलिसांनी याला तांत्रिक बिघाड असल्याचं म्हंटलं आहे आणि त्यावर तपास चालू आहे . गुन्हा उघडकीस येईपर्यंत त्यांना त्रास दिला जाणार नाही असे आश्वासन पोलिसांनी कुटुंबाला दिले आहे, पोलिसांचा या प्रकरणी तपास सुरु आहे.