मुंबई : क्रिकेटपटू स्मृती मंधाना (Smriti Mandhana) आणि संगीतकार तथा चित्रपट निर्माता पलाश मुच्छल (Palash Muchhal) लवकरच विवाहबंधनात अडकणार आहेत. या बहुप्रतिक्षित लग्नाची तारीखही जाहीर झाली असून, २३ नोव्हेंबर रोजी हे दोघे विवाह करणार आहेत. दरम्यान, या जोडप्याने नुकताच आपला साखरपुडा उरकल्याची घोषणा केली. स्मृतीने इन्स्टाग्रामवर 'हटके' अनाउन्समेंट केल्यानंतर, आता पलाश मुच्छलने एक रोमांचक व्हिडिओ शेअर केला आहे, ज्यामुळे चाहत्यांमध्ये उत्साहाचे वातावरण आहे. या व्हिडीओमध्ये पलाश त्याची होणारी बायको स्मृती मंधानाला चक्क क्रिकेटच्या मैदानात गुडघ्यावर बसून प्रपोज (Proposal) करताना दिसत आहे. पलाशने मुंबईच्या डीवाय पाटील स्टेडियमवर स्मृतीला हे खास सरप्राईज दिले. कॅमेऱ्यात कैद झालेल्या या क्षणामध्ये स्मृतीसोबतच पलाशही काहीसा इमोशनल झाल्याचं पाहायला मिळत आहे. या दोघांच्या केमिस्ट्रीवर त्यांचे चाहते सध्या प्रेमाचा वर्षाव करत आहेत. पलाशने शेअर केलेला हा रोमँटिक व्हिडिओ सोशल मीडियावर तुफान व्हायरल होत आहे. हे दोघेही आता २३ नोव्हेंबर रोजी आयुष्याच्या एका नव्या इनिंगला सुरुवात करणार आहेत.
गुडघ्यावर बसून घातली अंगठी
अशातच, लग्नापूर्वी पलाशने स्मृतीला दिलेले रोमँटिक सरप्राईज सध्या सोशल मीडियावर व्हायरल होत आहे. पलाश मुच्छलने आपल्या ऑफिशियल इन्स्टाग्राम अकाउंटवरून हा भावनिक क्षण शेअर केला आहे. व्हिडिओच्या सुरुवातीला पलाश आणि स्मृती डीवाय पाटील स्टेडियममध्ये एन्ट्री करताना दिसतात. विशेष म्हणजे, स्मृतीचे डोळे पट्टीने झाकलेले आहेत आणि पलाश तिला हात पकडून क्रिकेटच्या मैदानात घेऊन येतो. स्मृतीने डोळ्यावरची पट्टी काढताच तिला आश्चर्याचा मोठा धक्का बसतो. तेवढ्यात पलाशने वेळ न दवडता गुडघ्यावर बसून तिला प्रपोज केले. त्याने स्मृतीला लाल गुलाबांच्या फुलांचा गुच्छ दिला आणि अंगठी घालून आपल्या प्रेमाची कबुली दिली. हा क्षण इतका भावनिक होता की, स्मृती खूपच इमोशनल झाली, तर पलाशही काहीसा भावूक झाल्याचे पाहायला मिळाले. स्मृतीने तात्काळ पलाशला मिठी मारून आपल्या भावना व्यक्त केल्या. हा व्हिडिओ चाहत्यांच्या पसंतीस उतरला असून, त्यावर प्रेमाचा वर्षाव सुरू आहे. यानंतर २३ नोव्हेंबरला हे दोघे विवाहबंधनात अडकणार आहेत.
स्मृती मंधाना ज्याच्याशी लग्न करत आहे, तो पलाश मुच्छल कोण?
२२ मे १९९५ रोजी मध्य प्रदेशातील इंदूर येथे जन्मलेला पलाश मुच्छल हा एका मारवाडी कुटुंबात वाढला. या कुटुंबासाठी संगीत ही जवळजवळ मातृभाषाच आहे. त्याची मोठी बहीण पलक मुच्छल ही बॉलिवूडमधील एक लोकप्रिय पार्श्वगायिका आहे. बहिणीच्या पावलावर पाऊल ठेवून पलाशने संगीत क्षेत्रात आपली ओळख निर्माण केली. त्याने हिंदुस्थानी शास्त्रीय संगीताचे प्रशिक्षण घेतले आहे. विशेष म्हणजे, पलाशने अशा वेळी संगीत रचना (Music Composition) करण्याचा प्रयोग सुरू केला, जेव्हा त्याच्या वयाची बहुतेक मुले त्यांच्या आवडी-निवडी शोधत होती. पलाशने खूप लहान वयातच फिल्ममेकर म्हणूनही नाव कमावले आहे. मुच्छल भावंडे त्यांच्या धर्मादाय कार्यासाठी देखील ओळखली जातात. हृदय शस्त्रक्रियेची गरज असलेल्या वंचित मुलांसाठी निधी उभारण्यात पलाश आणि पलक हे दोघेही मोठा वाटा उचलतात. हा तरुण आणि यशस्वी संगीतकार आता स्मृती मानधनासोबत विवाहबंधनात अडकणार आहे.