मुंबई : कुर्ला पश्चिमे येथील विनोबा भावे नगरमधील एलआयजी कॉलनीच्या मागे असलेल्या मुबारक इमारतीत दुपारी गॅस पाइपलाइनमधून गळती झाली. या घटनेत कुठलीही जीवितहानी झाली नाही.
महानगर गॅस लिमिटेडच्या (एमजीएल) गॅस पाइपलाइनमध्ये गळती होऊन, मुबारक इमारतीच्या तळमजल्यावर अचानक आग लागली. गॅसच्या गळतीमुळे आग लागल्याने परिसरात मोठा धूर पसरला, आणि नागरिकांमध्ये घबराट पसरली.
घटनेची माहिती मिळताच, अग्निशमन दलाच्या तातडीच्या पथकांनी घटनास्थळी धाव घेतली. आणि आग आटोक्यात आणली. सुदैवाने या घटनेत कोणीही जखमी झाले नाही.
घटनास्थळी किमान चार अग्निशमन दलाच्या गाड्या आणि इतर बचाव यंत्रणा तैनात करण्यात आल्या होत्या. तसेच, महानगर गॅस लिमिटेडचे तज्ज्ञ देखील हजर होते.
गॅस पाइपलाइनमधील गळती त्वरित थांबवण्यासाठी आवश्यक त्या उपाययोजना राबवण्यात आल्या.
गॅस पाइपलाइन गळतीमुळे आग लागण्याच्या घटना मुंबईसारख्या शहरी परिसरात घडत असतात. गॅस कंपन्या आणि अन्य संबंधित विभागांनी यापुढे अशा घटनांमध्ये जलद प्रतिसाद देण्यासाठी अधिक प्रभावी उपाययोजना तयार कराव्यात अशी भावना व्यक्त केली जात आहे.