फरीदाबाद : दिल्लीतील लाल किल्ला मेट्रो स्टेशनजवळ रविवारी सायंकाळी ६ वाजून ५२ मिनिटांनी झालेल्या भीषण कार स्फोटाने (Car Blast) राजधानी हादरली आहे. या स्फोटात ९ लोकांचा मृत्यू झाला असून २० लोक जखमी झाले आहेत. स्फोट झालेली हुंडाई i२० कार घटनेपूर्वी सुमारे ३ तास सुनहरी मशिदीजवळ पार्क होती, अशी माहिती तपासात समोर आली आहे. दिल्ली पोलीस स्पेशल सेलला हा हल्ला फिदायीन (आत्मघाती) दहशतवादी हल्ला असल्याचा प्रबळ संशय आहे. या संपूर्ण कटात शिक्षित आणि प्रतिष्ठित डॉक्टर सहभागी असल्याचे धक्कादायक वास्तव समोर आले आहे.
'आत्मघातकी' हल्ल्याचा संशय, फरिदाबाद कनेक्शन उघड नवी दिल्ली : दिल्लीतील लाल किल्ला मेट्रो स्टेशनबाहेर झालेला स्फोट (Delhi Red Fort Blast) हा दहशतवादी हल्ला ...
तीन तास पार्क केलेली कार आणि स्फोट
ज्या हुंडई i२० कारमध्ये स्फोट झाला, ती कार सूनहरी मशिदीजवळ घटनेच्या तीन तास आधीपासून पार्क केलेली होती. स्फोटानंतर दिल्ली पोलिसांच्या स्पेशल सेलने तपास सुरू केला असता काही धक्कादायक पुरावे हाती आले. या पुराव्यांमुळे तपासकऱ्यांना जाणवले की हल्ल्यामागे एक प्रशिक्षित आणि संघटित नेटवर्क कार्यरत आहे आणि त्यात ‘डॉक्टर कनेक्शन’ समोर आलं आहे.
स्फोटाच्या घटनाक्रमातील 'डॉक्टर कनेक्शन'
या घटनेच्या काही दिवस आधी जम्मू-कश्मीर आणि फरीदाबाद पोलिसांनी संयुक्त कारवाई करत सुमारे २,९०० किलो आयईडी बनवण्याचे केमिकल, शस्त्रास्त्रे आणि दारूगोळा जप्त केला होता. ही कारवाई ‘जैश-ए-मोहम्मद (JeM)’ आणि ‘अंसर गजवात-उल-हिंद (AGuH)’ या दहशतवादी संघटनांशी संबंधित नेटवर्कवर करण्यात आली होती. या पार्श्वभूमीवर दिल्ली स्फोट आणि या जप्तीमधला संबंध शोधताना पोलिसांना काही डॉक्टरांकडे पोहोचता आले आहे.
१. डॉ. आदिल अहमद राठर- लॉकरमध्ये AK-४७
जम्मू-काश्मीरमधील अनंतनाग येथे मेडिकल कॉलेजमधील डॉक्टर डॉ. आदिल अहमद राठर याला पोलिसांनी अटक केली. त्याच्या लॉकरमधून AK-४७ रायफल सापडली. तपासात तो जैश आणि अंसर गजवात-उल-हिंद या संघटनांशी थेट संपर्कात असल्याचे उघड झाले.
२. महिला डॉक्टर शाहीन शाहिद- कारमध्ये असॉल्ट रायफल
दुसरी अटक फरीदाबादमध्ये झाली. लखनऊची महिला डॉक्टर शाहीन शाहिद, जी अल-फलाह विद्यापीठात प्राध्यापिका म्हणून कार्यरत होती, तिच्या कारमधून ‘कॅरोम कॉक’ असॉल्ट रायफल जप्त करण्यात आली. तिची भूमिका नेमकी काय होती, हे शोधण्यासाठी तपास सुरू आहे.
३. डॉ. अहमद मोहियुद्दीन सैयद- ‘रिसिन’ विष तयार करताना पकडला
गुजरात ATS ने ७ नोव्हेंबर रोजी डॉ. अहमद मोहियुद्दीन सैयद नावाच्या डॉक्टरला अटक केली. तो हैदराबादचा असून चीनमध्ये शिक्षण घेतलेला आहे. तो ‘रिसिन’ नावाचे अत्यंत प्राणघातक विष तयार करत होता, जे अरंडीच्या बियांपासून बनते. त्याने दिल्लीतील आजादपूर मंडी, अहमदाबादमधील नरोडा मार्केट आणि लखनऊ येथील RSS कार्यालय यांसारख्या गर्दीच्या ठिकाणांची रेकी केल्याचे आढळले.
४. डॉ. मुझमिल शकील- २,९०० किलो स्फोटकांसह अटक
१० नोव्हेंबरला फरीदाबादमध्ये आणखी एक अटक झाली- डॉ. मुझमिल शकील. तो देखील काश्मीरचा असून अल-फलाह विद्यापीठात प्राध्यापक आहे. त्याच्याकडे ३६० किलो अमोनियम नायट्रेट सापडले, तर दुसऱ्या ठिकाणाहून २५६३ किलो स्फोटक द्रव्य जप्त करण्यात आले. तो जैशसारख्या संघटनांशी थेट संपर्कात असल्याचे निष्पन्न झाले आहे.
ब्लास्ट झालेली i२० कार डॉक्टर उमर मोहम्मदच्या नावावर
ज्या i२० कारमध्ये स्फोट झाला ती दक्षिण काश्मीरच्या पुलवामा येथील डॉ. उमर मोहम्मद यांच्या नावावर नोंदणीकृत होती. तपासात तो स्फोटाच्या वेळी कारमध्ये असल्याची शक्यता व्यक्त केली जात आहे.
शिक्षित वर्गात पसरतोय दहशतवादाचा विष
या सर्व अटकांमुळे तपास यंत्रणांच्या नजरेत एक गंभीर बाब आली आहे आणि ती म्हणजे दहशतवाद आता शिक्षित आणि प्रतिष्ठित वर्गातही मुळे घट्ट करत आहे. पांढऱ्या कोटात दिसणारे हे डॉक्टर देशविघातक कटात सहभागी असल्याने ही घटना धक्कादायक ठरली आहे. पोलिस आणि गुप्तचर यंत्रणा आता या नेटवर्कचा आंतरराज्यीय स्तरावर तपास करत आहेत, तर दुसरीकडे या “डॉक्टर ते दहशतवादी” कथेनं देशभरात चिंता निर्माण केली आहे.
