मुंबई: भाजपाचे ज्येष्ठ खासदार निशिकांत दुबे यांनी महाराष्ट्र आणि मराठी भाषिकांविरोधात केलेल्या वादग्रस्त विधानांमुळे राजकीय वातावरण तापले आहे. त्यांच्या या विधानांवरून आता शिवसेनेचे मंत्री योगेश कदम यांनी तीव्र आक्षेप घेतला असून, "मराठी भाषिकांचा अपमान आम्ही कदापि सहन करणार नाही. त्यांच्या वरिष्ठांनी त्यांना समज द्यावी, अन्यथा आमचे शिवसैनिक त्यांना योग्य ती जागा दाखवतील," असा सज्जड इशारा दिला आहे.
दुबेंनी नेमके काय म्हटले?
काही हिंदी भाषिकांनी 'आम्ही मराठी बोलणार नाही' असे विधान केले होते. त्यानंतर मनसेच्या आक्रमक भूमिकेनंतर निशिकांत दुबे यांनी थेट महाराष्ट्र आणि मराठी भाषिकांवर गरळ ओकली. त्यांनी सुरुवातीला ट्विट करत म्हटले होते की, "हिंदी भाषिकांना मुंबईत मारणाऱ्यांनो, हिंमत असेल तर महाराष्ट्रात उर्दू भाषिकांना मारून दाखवा."
यावर न थांबता, दुबे यांनी पुढे म्हटले, "हिंदी भाषिकांना मराठी बोलण्याची सक्ती करणारे कुणाच्या पैशांवर जगत आहेत? टाटा, बिर्ला आणि रिलायन्स हे सर्व हिंदी भाषिक आहेत. सर्व करदाते हे बिहारी, झारखंड आणि उत्तर भारतीय आहेत. आमच्या पैशांवर जगत आहात. तुम्ही कोणताही कर भरत नाहीत. तुमचा कोणताही उद्योग नाही. आमच्या झारखंड, मध्यप्रदेश, ओडिशा आणि छत्तीसगडकडे खाणी आहेत. रिलायन्सची रिफायनरीही गुजरातमध्ये आहे. सेमीकंडक्टर कंपन्या गुजरातमध्ये जात आहेत. वरून तुम्ही लाठीमार करता. हिंमत आहे तर हिंदी भाषिकांप्रमाणे उर्दू, तमिळ, तेलुगू भाषिकांनाही मारून दाखवा. तुम्ही तुमच्या घरात मोठे आहात, बॉस आहात तर यूपी, बिहार किंवा तमिळनाडूला या, तुम्हाला आपटून आपटून मारू. आम्ही मराठी भाषेसह, छत्रपती शाहू महाराज, छत्रपती शिवाजी महाराज यांचा आदर करतो. सर्व मराठी स्वातंत्र्यसैनिकांचा सन्मान करतो. हे राजकारण राज ठाकरे आणि उद्धव ठाकरेंकडून केलं जात आहे. त्याचा आम्ही विरोध करतो."
दुबे यांच्या या विधानांवरून महाराष्ट्रात संतापाची लाट उसळली आहे. मंत्री योगेश कदम यांनी निशिकांत दुबे यांना हा शेवटचा इशारा असल्याचे म्हटले आहे. "ते चार टर्म खासदार आहेत, त्यांच्याकडून ही भाषा शोभत नाही," असेही कदम यांनी ठणकावले.
या प्रकरणी भाजपा पक्षश्रेष्ठी आता निशिकांत दुबे यांच्यावर काय कारवाई करतात, आणि या वादामुळे महाराष्ट्राच्या राजकारणात काय पडसाद उमटतात, हे पाहणे महत्त्वाचे ठरणार आहे.
