कणकवली तालुक्यात एकाचा वाहून गेल्याने मृत्यू
सिंधुदुर्ग: जिल्ह्यात गुरुवार पासून पावसाला पुन्हा सुरुवात झाली आहे. जिल्ह्याला आज आणि रविवारी १५ जूनला रेड अलर्ट तर उद्या ऑरेंज अलर्ट देण्यात आला आहे. गेल्या २४ तासात जिल्ह्यात ७१ मिमी पावसाची नोंद झाली. त्यात देवगड तालुक्यात सर्वाधिक १६६ मिलीमीटर पावसाची नोंद झाली.
मुसळधार पावसामुळे ओढे, नद्या दुथडी भरून वाहू लागल्या आहेत. कणकवली तालुक्यात तालुक्यातील कळसुली लिंगेश्‍वर गवसेवाडी येथील महेश दिनकर देसाई (५२) हे ओढ्यात वाहून गेले. ही घटना काल १२ जून रोजी सायंकाळी सातच्या सुमारास घडली. रात्री शोधाशोध मोहीम राबविण्यात आली.
यात मध्यरात्री एक वाजता त्‍यांचा मृतदेह आढळून आला. गुरुवारी दिवसभर मुसळधार पाऊस झाला होता. यात ओढ्याला मोठ्या प्रमाणात पाणी होते. हा ओढा पार करून घरी जात असताना ते वाहून गेल्‍याची शक्‍यता स्थानिकांनी व्यक्‍त केली आहे. वेंगुर्ले तालुक्यात परुळे येथे एका घरावर झाड पडून मोठं नुकसान झालं आहे.