मुंबई : मीरा भाईंदर महानगरपालिका क्षेत्रात सार्वजनिक शौचालय बांधकाम करताना किरीट सोमय्या यांच्या पत्नी डॉ. मेधा किरीट सोमय्या यांनी १०० कोटी रुपयांचा घोटाळा केल्याच्या आरोपावरून सोमय्या दांपत्यानी उबाठा गटाचे खासदार संजय राजाराम राऊत यांच्यावर दाखल केलेल्या अब्रुनुकसानीच्या खटल्यात माझगाव महानगर दंडाधिकारी न्यायालयाने खासदार संजय राऊत यांना १५ दिवसांची कैद आणि २५ हजार रूपयांचा दंड अशी शिक्षा सुनावली.
त्यानंतर लगोलग संजय राऊत यांच्याकडून अटकपूर्व जामीनासाठी अर्ज करण्यात आला. १५ हजारांच्या जातमुचलक्यावर संजय राऊतांना जामीन मंजूर झाला आहे. तसेच ३० दिवसांच्या आत वरच्या कोर्टात अपिल करून दाद मागण्याची मुभाही कोर्टाकडून देण्यात आली आहे.
मीरा-भाईंदर महापालिकेकडून मीरा-भाईंदर शहरात १५४ सार्वजनिक शौचालयं बांधण्यात आली. त्यापैकी १६ शौचालयं बांधण्याचं कंत्राट भाजप नेते किरीट सोमय्या यांच्या पत्नी मेधा सोमय्या यांच्या युवा प्रतिष्ठानला मिळालं होतं. बनावट कागदपत्र सादर करुन मेधा सोमय्या यांनी मीरा-भाईंदर पालिका अधिकाऱ्यांची फसवणूक केली, असा आरोप संजय राऊत यांनी केला होता. मेधा सोमय्या यांनी त्यांच्यावर करण्यात आलेल्या आरोपांना कोर्टात आव्हान दिलं होतं. या खटल्याचा निकाल सोमय्या यांच्या बाजूने लागला.