लोकसभा निवडणुकीच्या पहिल्या टप्प्यातील २५२ उमेदवारांवर खून, बलात्कार आणि फसवणूकीचे गुन्हे

नवी दिल्ली : लोकसभा निवडणूक २०२४ साठी १९ एप्रिल रोजी होणाऱ्या सार्वत्रिक निवडणुकीच्या पहिल्या टप्प्यात लढणाऱ्या उमेदवारांच्या गुन्हेगारी नोंदी तपासल्या असता धक्कादायक आकडेवारी उजेडात आली आहे.

असोसिएशन फॉर डेमोक्रॅटिक रिफॉर्म्स (ADR) आणि नॅशनल इलेक्शन वॉचने (National Election Watch) केलेल्या विश्लेषणामध्ये ही आकडेवारी पुढे आली. त्यानुसार लोकसभा निवडणुकीच्या पहिल्या टप्प्यात सहभागी झालेल्या १ हजार ६२५ उमेदवारांच्या स्व-प्रतिज्ञापत्रांच्या विश्लेषणानुसार, एकूण २५२ उमेदवारांवर फौजदारी गुन्हे दाखल आहेत.

आकडेवारीवरून असे दिसून आले आहे की, २५२ पैकी ७ उमेदवारांवर खुनाचा आरोप आहे. तर १९ जणांवर खुनाचा प्रयत्न केल्याचा आरोप आहे.

१६१ उमेदवारांवर गंभीर गुन्हे दाखल आहेत, तर १८ उमेदवारांवर महिलांविरुद्धच्या गुन्ह्यांशी संबंधित आरोप आहेत. ३५ उमेदवार द्वेषयुक्त भाषणाशी संबंधित प्रकरणांमध्ये अडकले आहेत. याव्यतिरिक्त, १५ उमेदवारांनी त्यांच्या स्व-प्रतिज्ञापत्रांत त्यांना दोषी ठरविलेले प्रकरण घोषित केले आहेत. राजकीय पक्षांच्या संलग्नतेच्या बाबतीत, राष्ट्रीय जनता दल (आरजेडी) च्या चारही उमेदवारांनी स्वतःवर फौजदारी गुन्हे दाखल केले असल्याचे म्हटले आहे. याउलट, बहुजन समाज पक्ष (BSP) मध्ये सर्वात कमी उमेदवार आहेत ज्यात गुन्हेगारी खटले आहेत. बसपच्या ८६ पैकी केवळ ११ उमेदवारांवर अशी नोंद आहे.

पहिल्या टप्प्यात ज्यांची एकूण संपत्ती १ कोटीपेक्षा जास्त आहे असे ४५० ‘कोटीपती’ उमेदवार निवडणुकीच्या मैदानात उतरले आहेत. यात भारतीय जनता पक्ष (भाजपा) ६९ करोडपती उमेदवारांसह आघाडीवर आहे. त्यानंतर काँग्रेस ४९ उमेदवारांसह, ऑल इंडिया अण्णा द्रविड मुन्नेत्र कळघम (एआयएडीएमके) ३५ आणि द्रविड मुन्नेत्र कळघम (डीएमके) २१ उमेदवारांसह आघाडीवर आहे.

उमेदवारांच्या संपत्तीची कोटीच्या कोटी उड्डाणे…

एआयएडीएमके उमेदवारांची सर्वाधिक सरासरी मालमत्ता ३५.६१ कोटी आहे. त्यानंतर डीएमके ३१.२२ कोटी, काँग्रेसची २७.७९ कोटी आणि भाजपची २२.३७ कोटी आहे.

यामध्ये सर्वात श्रीमंत उमेदवार छिंदवाडा येथील काँग्रेसचे नकुल नाथ आहेत. त्यांची एकूण संपत्ती ७१६.९४ कोटी आहे. त्यांच्या खालोखाल एआयएडीएमकेचे अशोक कुमार ६६२.४६ कोटींच्या मालमत्तेसह इरोडमधून निवडणूक लढवत आहेत. तर शिवगंगामधून निवडणूक लढवणारे भाजपचे देवनाथन यादव टी ३०४.९२ कोटींचे मालक आहेत.