दिव्यातील मातोश्री संकुलात रस्त्यावर उकीरडा!

ठाणे : एकीकडे मुख्यमंत्र्यांचे बदलते ठाणे घडविण्यासाठी ठामपा आयुक्त अभिजीत बांगर यांनी शहर स्वच्छतेवर मोठा भर दिल्याचे दिसत असताना दुसरीकडे ठामपाच्याच हद्दीत असलेल्या दिवा प्रभाग समितीचे सफाईकडे दुर्लक्ष होत असल्याचे दिसत आहे.

दिव्यातील मातोश्री संकुलाच्या दारात ओरसिट अपार्टमेंटच्या मागील बाजूस रस्त्यावर गेली अनेक दिवस रस्त्यातच कचरा टाकण्यात येत आहे. यामुळे रस्त्यावर अस्ताव्यस्त कचरा साचल्याने रहिवाशांना नाक दाबून घाणीतून वाट काढावी लागत आहे.

अनेक वेळा याबाबत तक्रारी करून देखील कुठल्याही प्रकारची कारवाई होत नाही याकडे स्थानिक लोकप्रतिनिधींनी लक्ष देऊन रहिवाशांची समस्या सोडविण्यासाठी प्रयत्न करावा, अशी मागणी मातोश्री संकुलातील रहिवाशांनी केली आहे.