पनवेल : प्रादेशिक परिवहन कार्यालय, पनवेल कार्यालयामध्ये दुचाकी मोटार वाहनांच्या नवीन नोंदणीसाठी MH46 CD ही नवीन मालिका लवकरच सुरु होत असल्याचे उपप्रादेशिक परिवहन अधिकारी, पनवेल यांनी कळविले आहे.
पनवेल कार्यालयाच्या कार्यक्षेत्रातील उरण, पनवेल, कर्जत व खालापूर तालुक्यातील नागरिकांना याद्वारे आवाहन करण्यात येते की, ज्यांना आपल्या नवीन वाहनासाठी MH46 CD या मालिकेतील महाराष्ट्र मोटार वाहन नियम 1989 च्या नियम 57अ अन्वये आकर्षक/अनाकर्षक नोंदणी क्रमांक राखीव करावयाचे असतील त्यांनी प्रादेशिक परिवहन कार्यालय, पनवेल या कार्यालयात कार्यालयीन कामकाजाच्या दिवशी सकाळी 10.00 ते दुपारी 2.00 या वेळेत संपर्क साधण्यात यावा. असे आवाहन प्रादेशिक परिवहन अधिकारी अभय देशपांडे यांनी केले आहे.
एकाच नोंदणी क्रमांकासाठी एकापेक्षा जास्त अर्जदारांनी अर्ज केल्यास तरतूदीनुसार नोंदणी क्रमांकासाठी जाहीर लिलाव केला जाईल याची नोंद घेण्यात यावी, असे प्रादेशिक परिवहन अधिकारी, पनवेल यांनी एका प्रसिध्दी पत्रकान्वये कळविले आहे.