नवीन पनवेल :अनुष्ठान मंडळ, पनवेल यांच्या वतीने समाजस्वास्थ्यासाठी नुकतेच ‘सौरयाग’ अनुष्ठान संपन्न झाले. कोविड नियमांचे पालन करून बल्लाळेश्वर मंदिरामध्ये हे अनुष्ठान संपन्न झाले. अनुष्ठान काळामध्ये नित्य होमहवन, दीपोत्सव, सतीश रानडे व सहकारी यांची भजनसेवा, सत्यसूर्यपूजन, नित्य आरती, मंत्रपुष्प अष्टावधान सेवा, नामसंकीर्तन, बलिदान, पूर्णाहूती आदी धार्मिक विधी संपन्न झाले. वेदमूर्ती उदयराज जोशी यांनी आचार्य म्हणून काम पाहिले. गणेश व सुखदा घाणेकर यांनी यजमानपद भूषविले.
हा कार्यक्रम संपन्न करण्यासाठी वेदमूर्ती शैलेश करंदीकर, ललित बर्वे, समीर भट, पुष्कर लिमये आदींसह सर्व सभासद व महिला वर्गाने मोलाचे योगदान दिले.
पनवेलमधील पुरोहित मंडळींनी पुढाकार घेऊन अनुष्ठान मंडळ स्थापन केले असून प्रतिवर्षी जनकल्याणाच्या हेतूने विविध प्रकारची अनुष्ठाने करण्यात येतात. मंडळाचे यंदाचे हे १९ वे अनुष्ठान आहे.