वाढीव बांधकामे आणि अनधिकृत स्टॉल्स जमीनदोस्त
मुंबई (विशेष प्रतिनिधी) : बोरीवली आणि कांदिवली येथील अनधिकृत बांधकाम अंक फेरीवाले यांच्या विरोधातील कारवाई सुरू असून शुक्रवारी २० फेब्रुवारी रोजी बोरिवली (पश्चिम) आणि कांदिवली (पश्चिम) येथील महावीर नगर परिसरातील मिळून २५ अनधिकृत बांधकामे आणि ३५ अनधिकृत स्टॉल्सवर कारवाई करण्यात आली.
उप आयुक्त (परिमंडळ ७) संध्या नांदेडकर यांच्या मार्गदर्शनाने, सहाय्यक आयुक्त (आर मध्य विभाग) डॉ. प्रफुल तांबे आणि सहायक आयुक्त (आर दक्षिण विभाग) आरती गोळेकर यांच्या नेतृत्वात ‘आर दक्षिण’ प्रशासकीय विभाग अंतर्गत कार्यरत विविध विभागांकडून संयुक्तपणे ही कारवाई करण्यात आली. परिरक्षण, अतिक्रमण निर्मूलन, इमारत व कारखाने तसेच घनकचरा व्यवस्थापन या विभागांचे अधिकारी व कर्मचारी यांनी संयुक्तपणे ही मोहीम राबवली.
महावीर नगर, पोयसर जिमखाना परिसरात अनधिकृत बांधकामे निर्माण झाली होती. तसेच, अनधिकृत फेरीवालेही आढळून आले होते. यामुळे, परिसरातील वाहतुकीस आणि पादचाऱ्यांना मार्गक्रमण करण्यात अडथळा येत होता. या पार्श्वभूमीवर, ‘आर दक्षिण’ प्रशासकीय विभाग अंतर्गत कार्यरत विविध विभागांकडून व्यापक मोहीम हाती घेण्यात आली.
३ जेसीबी, ५ डंपर आदी संयंत्रासह सुमारे ५० अधिकारी व कर्मचारी कारवाईत सहभागी झाले होते. यावेळी पुरेसा पोलिस बंदोबस्त देखील होता. या कारवाईमुळे नागरिकांसाठी रस्ते व सार्वजनिक जागा मोकळ्या झाल्या. यापुढेही अनधिकृत बांधकामे, अनधिकृत फेरीवाले आदीविरोधातील कारवाई सुरु राहील, असे महानगरपालिका प्रशासनाकडून स्पष्ट करण्यात येत आहे.
