पालघर (प्रतिनिधी) : रायगड जिल्ह्यातील हरिहरेश्वर इथल्या समुद्रात बेवारस अवस्थेतील बोटीत सापडलेल्या हत्याराने सर्व सरकारी यंत्रणा अलर्ट झाल्या आहेत. त्यामुळे १२० किलोमीटर लांबीचा समुद्रकिनारा लाभलेला पालघर जिल्हासुद्धा सावध झाला आहे. त्यामुळे जिल्ह्यातील समुद्रकिनाऱ्यावर कडेकोट बंदोबस्त ठेवण्यात आल्याची माहिती पालघर पोलीस अधीक्षक बाळासाहेब पाटील यांनी दिली. त्याचप्रमाणे डहाणू येथे असलेल्या तटरक्षक दलाकडूनही सतर्कता बाळगण्यात आल्याची माहिती देण्यात आली.

पालघर जिल्ह्यात सुमारे १२० किलोमीटर लांबीचा समुद्रकिनारा लाभला असून रायगड जिल्ह्यातील हरिहरेश्वर इथल्या समुद्रात बेवारस अवस्थेतील बोटीमध्ये हत्यारे सापडली होती. त्यामुळे समुद्र किनारपट्टी ठिकाणी कुठलाही प्रकारचा अनूचित प्रकार घडू नये याकरिता सावधानतेच्या सूचना पालघर पोलिसांकडून जिल्ह्यातील आठ सागरी पोलीस ठाण्यांना देण्यात आल्या आहेत. तर रायगड मधल्या या घटनेनंतर सर्व ठिकाणी नाकाबंदी सुरू करण्यात आली आहे. सर्व प्रभारी अधिकारी त्यांच्या हद्दीत बंदोबस्त ठेवून (एसओपी) कृती आराखड्यानुसार जिल्ह्यात काम सुरू आहे. सुमारे शंभर ते दीडशे पोलीस समुद्रकिनाऱ्यावर लक्ष ठेवून असल्याचेही बाळासाहेब पाटील यांनी सांगितले.

कोणताही अनूचित प्रकार घडू नये याकरिता मच्छीमार सोसायटी यांच्याशी संपर्क साधण्यात आला आहे. मासेमारीसाठी समुद्रात गेलेल्या मासेमारी बोटींना समुद्रात काही संशयास्पद हालचाल दिसल्यास पोलिसांशी संपर्क साधण्याच्या सूचना देण्यात आल्या आहेत. मानक ऑपरेटिंग प्रक्रिया (एसओपी) कार्यान्वित करण्यात आल्या असून मच्छीमार वस्त्यांमध्ये असलेली लहान मोठे गट जे समुद्रावर देखरेख ठेवण्याची काम करतात त्यांच्याशीही संपर्क साधण्यात आला असून समुद्रकिनाऱ्यावरून बाहेर पडणारे मार्ग म्हणजे जेटी बंदर या ठिकाणी नाकाबंदी करण्यात आली आहे.

ज्या ठिकाणी टॉवर्स आहेत. तिथे टेहळणी पथके लक्ष ठेवून आहेत. स्थानिक पातळीवर संपर्क साधण्यात येत असून तटरक्षक दलाशी ही संपर्क साधण्यात आला आहे, असेही बाळासाहेब पाटील यांनी सांगितले फोर्स वनच्या धरतीवर जलद प्रतिक्रिया पथक तयार असून काही प्रसंग घडल्यावर त्याला सडेतोड जवाब देण्यासाठी टीम तयार ठेवण्यात आली आहे. त्यांच्याकडे अत्याधुनिक हत्यारे उपलब्ध असून त्यांना अतिमहत्त्वाच्या ठिकाणी तैनात करण्यात आल्याचेही पोलीस अधीक्षक पाटील यांनी सांगितले.

अशा घटना राज्यात कुठेही घडल्यावर मच्छीमार सतर्कता बाळगतात व कुठेही संशयास्पद हालचाल दिसल्यावर त्वरित पोलिसांशी संपर्क साधून त्याबाबतची खबर पोलिसांपर्यंत पोहोचवण्याचे काम करत असतात. – राजन मेहेर, चेअरमन सातपाटी मच्छीमार सोसायटी

मुंबई किनारे आणि आजूबाजूच्या समुद्र किनाऱ्यावर आम्ही विशेष लक्ष दिले आहे. सागर रक्षक दलाचे जवान यांना सतर्क केले आहे. त्यांची नजर असणार आहे. कोणतीही वस्तू अथवा व्यक्ती संशयास्पद वाटली तर ताब्यात घेण्याचे आदेश देण्यात आले आहेत. – विजयकांत सागर, पोलीस उपायुक्त, मीरा-भायंदर पोलीस मुख्यालय.

पालघर (प्रतिनिधी) : तारापूर अणुऊर्जा केंद्राच्या सुरक्षेच्या कारणास्तव या प्रकल्पाच्या परिसरात ड्रोन, पॅराग्लायडर, हँडग्लायडर तसेच तत्सम हवाई साधनांचा वापर करण्यास १५ ऑक्टोबरपर्यंत बंदी घालण्यात आली आहे. जिल्हा प्रशासनाने नूकताच हा आदेश जारी केला असून भंग केल्यास फौजदारी कारवाईचा इशारा देण्यात आला आहे.

तारापूर अणुशक्ती केंद्र हे अत्यंत महत्त्वाचे ठिकाण असून त्याच्या सुरक्षेची जबाबदारी केंद्रीय औद्योगिक सुरक्षा बलाकडे आहे. सुरक्षेच्या दृष्टीने सरकारने निश्चित केलेल्या कार्यप्रणालीनुसार, या भागामध्ये ड्रोन अथवा तत्सम हवाई साधने, पॅराग्लाइडर, पॅरामोटर्स, हँडग्लायडर्स यांच्या वापरास मनाई करण्यात आली आहे.

त्यामुळे पालघरचे अप्पर जिल्हा दंडाधिकारी डॉ. किरण महाजन यांनी याबाबतचे आदेश जारी केले. १८ ऑगस्ट सकाळी १ वाजल्यापासून ते १५ ऑक्टोबर रोजी रात्री बारा वाजेपर्यंत हे मनाई आदेश लागू आहेत. नागरी हवाई वाहतूक संचालनालयाने अणुऊर्जा प्रकल्पालगतचे ऑफलाइन झोन जाहीर असल्याने ड्रोन व इतर हवाई साधने वापरण्यास मनाईचा आदेश पारित करून घेण्याबाबत पालघरच्या पोलीस अधीक्षकांनी कळवले होते.

कुडूस (वार्ताहर) : वाडा तालुक्यातील गारगाव जिल्हा परिषद गटातील पाचघरसह अतिदुर्गम भागाची जिल्हाधिकाऱ्यांनी शुक्रवारी १९ ऑगस्ट रोजी प्रत्यक्ष पाहणी करून येथील ग्रामस्थांकडून रस्ते, पणी, शिक्षण व आरोग्यविषयक समस्या जाणून घेतल्या. यावेळी ग्रामस्थांनी आपल्याला भेडसावत असलेल्या समस्यांचा पाढाच अधिकाऱ्यांसमोर मांडून भावना व्यक्त केल्या.

तालुक्यातील अतिदुर्गम असलेल्या पाचघर या गावाजवळ गर्भवती महिलेला स्थानिक परळी येथील प्राथमिक आरोग्य केंद्रात घेवून जात असताना चिखलात रुतलेल्या जीपगाडीला धक्के मारून मुख्य रस्त्यापर्यंत आणावे लागले होते. सदरचा व्हीडीओ समाज माध्यमात प्रसिद्ध झाल्याने ही घटना उघडकीस आली होती. या घटनेच्या पार्श्वभूमीवर हा पाहणी दौरा करण्यात आला होता.

पाचघर गावांसह तालुक्यातील अतिदुर्गम भागातील रस्ते, शिक्षण, पाणी व आरोग्यविषयक समस्यांची सोडवणूक प्राधान्य क्रमांकाने करण्यात यावी, अशी मागणी सामाजिक कार्यकर्ते अनंता वनगा यांनी यावेळी प्रत्यक्ष पाहणी दौऱ्यादरम्यान आलेल्या जिल्हाधिकाऱ्यांकडे केली. या घटनेची शासनस्तरावर गांभीर्यपूर्वक दखल घेतली असून तातडीने समस्यांचे निवारण केले जाईल, असे यावेळी जिल्हाधिकारी गोविंद बोडके यांनी पाहणी दरम्यान उपस्थीत ग्रामस्थांना सांगितले. या पाहणी दौऱ्यात पालघरचे जिल्हाधिकारी गोविंद बोडके, उपविभागीय अधिकारी भवानजी आगे पाटील, जि.प. सदस्या रोहिणी शेलार, पंचायत समिती गटविकास अधिकारी, बांधकाम विभागाचे अधिकारी, आरोग्य अधिकारी यांच्यासह ग्रामस्थ मोठ्या संख्येने उपस्थित होते.

विरार (प्रतिनिधी) : मान्सून काळात वसईतील अभयारण्य, धबधबे, धरण व तलाव परिसरात पर्यटनाचा आनंद घेण्यासाठी येणाऱ्या पर्यटकांच्या जीविताची काळजी घेण्याच्या अनुषंगाने येथील पर्यटन स्थळांच्या एक किलोमीटर परिसरात पोलिसांनी पुन्हा प्रतिबंधात्मक मनाई आदेश लागू केले आहेत. त्यानुसार वसई पोलीस ठाणे अंतर्गत येणाऱ्या सुरुची बाग, रानगाव बीच, ब्रह्म पाडा व भुईगाव बीच; तर वालीव पोलीस ठाणे अंतर्गत चिंचोटी धबधबा, देवकुंडी कामण व राजवली खदान परिसर प्रतिबंधित क्षेत्र म्हणून घोषित करण्यात आले आहे.

वसई-विरार, मीरा-भाईंदर पोलीस आयुक्तालय परिमंडळ-२ वसई कार्यक्षेत्रातील अभयारण्य, धबधबे, समुद्रकिनारे आणि तलावांवर पर्यटनाचा आनंद घेण्यासाठी मुंबई, पालघर, रायगड व ठाणे येथून अनेक पर्यटक येत असतात. मात्र या ठिकाणी जाण्यासाठीच्या वाटा अरुंद असल्याने पर्यटकांच्या जीविताची व वित्तहानीची शक्यता असते. याशिवाय पर्यटनस्थळी टिंगळटवाळीसारख्या घटना घडत असतात. काही वेळा महिलांच्या छेडछाडीचे प्रकार घडतात. मद्यपान पर्यटक करून पाण्यात उतरत असल्याने जीविताला धोका उदभवतो.

सार्वजनिक ठिकाणी बेदरकारपणे वाहने चालवून वाहतुकीला पर्यायाने अन्य पर्यटकांची कोंडी केली जाते. पर्यटनाच्या नावाखाली वायू, ध्वनी, जल प्रदूषणही मोठ्या प्रमाणात होत असते. त्यामुळे वसई-विरार, मीरा-भाईंदर पोलीस आयुक्तालय परिमंडळ-२ वसई कार्यक्षेत्रातील पोलीस ठाण्याअंतर्गत येणाऱ्या अभयारण्य, धबधबे, समुद्रकिनारे आणि तलाव परिसरात हे मनाई आदेश लागू करण्यात आले आहेत. हे आदेश २० ऑगस्टपासून ३ सप्टेंबरपर्यंत लागू असणार आहेत.

या आधी १४ ते २८ जुलै या कालावधीत माणिकपूर, तुळींज, वालीव व आचोळे पोलीस ठाण्याअंतर्गतही अशा प्रकारचे आदेश लागू करण्यात आले होते. दरम्यान; या आदेशांचे उल्लंघन करणाऱ्यांविरोधात भारतीय दंड संहिता १८६० चे कलम १८८नुसार फौजदारी कारवाई करण्यात येणार असल्याची माहिती पोलीस आयुक्तालयाने दिली आहे.