वाहतूक नियमांचे पालन व्हावे आणि अपघातांचे प्रमाण कमी व्हावे यासाठी ट्रॅफिक पोलिसांकडून सातत्याने वेगवेगळ्या प्रकारे प्रयत्न केले जातात. असाच एक अनोखा आणि मन जिंकणारा प्रकार नुकताच समोर आला असून, विनाहेल्मेट स्कूटी चालवणाऱ्या तरुणींना दंड न आकारता अत्यंत आपुलकीने आणि विनोदी शैलीत नियमांची आठवण करून देणाऱ्या एका ट्रॅफिक पोलीस अधिकाऱ्याचा व्हिडिओ सोशल मीडियावर प्रचंड व्हायरल होत आहे.
रात्रीच्या गस्तीदरम्यान घडला प्रकार
View this post on Instagram
मिळालेल्या माहितीनुसार, रात्रीच्या वेळी गस्त घालत असताना ट्रॅफिक पोलीस अधिकाऱ्याने विनाहेल्मेट स्कूटीवरून जाणाऱ्या दोन बुरखाधारी विद्यार्थिनींना थांबवले. नेहमीप्रमाणे त्यांच्यावर दंडात्मक कारवाई न करता अधिकाऱ्याने अत्यंत शांतपणे आणि मित्राप्रमाणे संवाद साधण्यास सुरुवात केली. त्यांनी तरुणींना "तुम्ही शिक्षण घेताय ना?" असा प्रश्न विचारत, "स्कूटी खरेदी करताना त्यासोबत मिळालेले हेल्मेट कुठे आहे?" असा सवाल केला. रस्ता सुरक्षेचे महत्त्व पटवून देताना अधिकारी म्हणाले की, "कोणताही अपघात झाला तर त्याचा सर्वात मोठा फटका तुमच्या कुटुंबाला आणि आई-वडिलांना बसतो."
नवी दिल्ली : केंद्रीय गृहमंत्री अमित शाह (Amit Shah) यांनी सरकारी कार्यक्रमांमध्ये 'वंदे मातरम' गायनाच्या नियमांचे पालन न करण्याच्या निर्णयावरून काँग्रेसवर ...
"नकाबसारखेच हेल्मेटही गरजेचे"
गप्पा मारताना अधिकाऱ्याने मुलींना मजेशीर पण डोळ्यात अंजन घालणारा सल्ला दिला. "ज्याप्रमाणे तुम्ही चेहरा झाकण्यासाठी मास्क किंवा नकाब वापरता, त्याचप्रमाणे डोक्याच्या संरक्षणासाठी हेल्मेट घालणे देखील तितकेच आवश्यक आहे," असे त्यांनी सांगितले. दंडाची पावती फाडण्याऐवजी अधिकाऱ्याने तरुणींकडून एक महत्त्वाचे वचन घेतले—यापुढे घरातून बाहेर पडताना त्या कधीही हेल्मेट विसरणार नाहीत. तरुणींनी वचन दिल्यानंतर अधिकाऱ्याने त्यांचे आभार मानत त्यांना पुढे जाण्याची परवानगी दिली.
नेटकऱ्यांकडून कौतुकाचा वर्षाव
हा संपूर्ण प्रसंग '@tsi_ajay_sharma' या इंस्टाग्राम अकाऊंटवरून शेअर करण्यात आला आहे. पोलिसांच्या या समंजस आणि आपुलकीच्या भूमिकेमुळे नेटकरी कमालीचे प्रभावित झाले आहेत. कमेंट सेक्शनमध्ये युजर्स या अधिकाऱ्याचे भरभरून कौतुक करत आहेत. "लोकांमध्ये धाक निर्माण करण्यापेक्षा असा आपुलकीचा संवादच नियमांचे पालन करायला शिकवतो," अशा प्रतिक्रिया देत नागरिकांनी या पोलीस अधिकाऱ्याच्या कार्यपद्धतीला सलाम केला आहे.
