- केंद्रीय निवडणूक आयोगाचा निर्णय; प्रारूप यादी आता ३१ ऑगस्टला प्रसिद्ध होणार
मुंबई : महाराष्ट्रातील मतदारयाद्यांच्या ‘विशेष सखोल पुनरीक्षण’ (एसआयआर) कार्यक्रमाच्या वेळापत्रकात केंद्रीय निवडणूक आयोगाने बदल केले आहेत. नवीन आदेशानुसार, आता राज्यातील मतदारयाद्यांची प्रारूप (ड्राफ्ट) प्रसिद्धी ३१ ऑगस्ट २०२६ रोजी केली जाणार आहे. (SIR)
केंद्रीय निवडणूक आयोगाचे यासंदर्भातील पत्र १९ ऑगस्ट रोजी महाराष्ट्राच्या मुख्य निवडणूक अधिकाऱ्यांना प्राप्त झाले आहे. या पत्रानुसार, पुनरीक्षण मोहिमेच्या टप्प्यांचे सुधारित वेळापत्रक जाहीर करण्यात आले असून, त्याची अंमलबजावणी तातडीने करण्याचे निर्देश देण्यात आले आहेत. सुधारित वेळापत्रकानुसार, २४ ऑगस्ट २०२६ रोजी मतदान केंद्रांचे सुसूत्रीकरण व पुनर्रचना करण्याचे काम पूर्ण केले जाईल. त्यानंतर, ३१ ऑगस्ट रोजी मतदारयाद्यांची प्रारूप प्रसिद्धी केली जाईल. (SIR)
प्रारूप यादी प्रसिद्ध झाल्यानंतर ३१ ऑगस्ट ते ३० सप्टेंबर २०२६ या कालावधीत नागरिकांना मतदारयादीतील नोंदींवर दावे आणि हरकती दाखल करता येणार आहेत. त्यानंतर ३१ ऑगस्ट ते २९ ऑक्टोबर या काळात नोटीस टप्पा आणि दाखल दावे-हरकतींवर निर्णय व सुनावणीची प्रक्रिया पार पडेल. या संपूर्ण प्रक्रियेनंतर, ४ नोव्हेंबर २०२६ रोजी अंतिम मतदारयादी जाहीर केली जाणार आहे.
निवडणूक आयोगाने दिलेल्या निर्देशानुसार, सर्व संबंधित यंत्रणांना या बदलाची अंमलबजावणी तातडीने करण्याचे आदेश देण्यात आले आहेत. तसेच, या सुधारित वेळापत्रकाची माहिती सर्वसामान्यांपर्यंत पोहोचवण्याचे आवाहन करण्यात आले आहे. यासोबतच, राज्यातील सर्व मान्यताप्राप्त राजकीय पक्षांनाही या बदलाबाबत लेखी स्वरूपात अवगत करण्याचे निर्देश जिल्हा निवडणूक अधिकारी आणि प्रशासनाला देण्यात आले आहेत. (SIR)