ठाण्यातील चितळसर-मानपाडा येथील म्हाडाच्या गृहप्रकल्पातील घरांच्या किमती आता कमी होणार आहेत. उपमुख्यमंत्री एकनाथ शिंदे यांनी या घरांच्या किमती २०२०-२१ च्या रेडी रेकनर दरानुसार निश्चित करण्याचे निर्देश दिले आहेत. त्यामुळे या गृहप्रकल्पातील सदनिका आता अंदाजे ४४ ते ४६ लाख रुपयांत उपलब्ध होणार आहेत.
चितळसर-मानपाडा येथील म्हाडाच्या गृहप्रकल्पात एकूण १,१७३ घरे उपलब्ध आहेत. यापैकी ९३८ घरांची सोडत १४ जुलै २०२५ रोजी काढण्यात आली होती. त्यावेळी २०२५-२६ च्या रेडी रेकनर दरानुसार घरांच्या किमती निश्चित करण्यात आल्या होत्या. त्यामुळे काही सदनिकांच्या किमती ५१ ते ५२ लाख रुपयांपर्यंत पोहोचल्या होत्या.
मुंबई : महाराष्ट्रातील लोककला आणि लोककलावंतांना प्रोत्साहन देण्यासाठी आता राज्याच्या प्रत्येक विभागात भव्य लोककला महोत्सव आयोजित करण्यात येणार ...
दरम्यान, या घरांना २०२०-२१ मध्ये अंशतः भोगवटा प्रमाणपत्र मिळाले होते. त्यावेळी सदनिकांची किंमत सुमारे ४४ लाख रुपये निश्चित करण्यात आली होती. मात्र, २०२५-२६ मध्ये पूर्ण भोगवटा प्रमाणपत्र मिळाल्यानंतर उर्वरित सदनिकांच्या किमती वाढवण्यात आल्या. एकाच इमारतीतील समान क्षेत्रफळाच्या घरांसाठी वेगवेगळे दर आकारले जात असल्याने नागरिकांनी याबाबत तक्रारी केल्या होत्या.
या तक्रारींची दखल घेत उपमुख्यमंत्री एकनाथ शिंदे यांनी २०२०-२१ चा रेडी रेकनर दर ग्राह्य धरून सर्व सदनिकांच्या किमती निश्चित करण्याचे निर्देश दिले. तसेच, आधीच्या सोडतीतील ४३४ विजेत्या लाभार्थ्यांनी स्वीकृती पत्रे जमा केली असल्याने त्यांचे लाभ कायम ठेवण्यात येणार आहेत.
उर्वरित सदनिकांसाठी आता सुधारित दरानुसार नव्याने सोडत काढण्यात येणार आहे. त्यामुळे ठाण्यात परवडणाऱ्या घराच्या प्रतीक्षेत असलेल्या नागरिकांना मोठा दिलासा मिळणार असून, नव्या लॉटरीकडे अनेकांचे लक्ष लागले आहे.
