छत्रपती संभाजीनगर : विमानतळावर आकर्षक पगाराची नोकरी देण्याचे आमिष दाखवून महाराष्ट्रातील अनेक सुशिक्षित बेरोजगार तरुणांची फसवणूक केल्याचा आरोप समोर आला आहे. भरती प्रक्रिया सरकारी नोकरीच्या धर्तीवर असल्याचे भासवून विद्यार्थ्यांकडून अर्ज आणि परीक्षा शुल्काच्या नावाखाली 500 ते 700 रुपये घेतल्याचा दावा करण्यात येत आहे. मात्र, परीक्षा देण्यासाठी विद्यार्थी केंद्रावर पोहोचले असता तिथे परीक्षेसाठी कोणतीही व्यवस्था नसल्याने गोंधळ उडाला. (Airport Job Fraud)
विमानतळावर विविध पदांवर नोकरी आणि महिन्याला 25 हजार रुपयांपर्यंत पगार मिळणार असल्याचे सांगण्यात आल्याने अनेक तरुणांनी या भरतीसाठी अर्ज केला होता. विद्यार्थ्यांनी ऑनलाइन अर्ज भरून परीक्षा शुल्कही जमा केले. त्यानंतर परीक्षेची तयारी करून ते निर्धारित परीक्षा केंद्रावर पोहोचले. (Job Scam)
रविवारी परीक्षा असल्याने राज्यातील विविध भागांतून विद्यार्थी छत्रपती संभाजीनगरमधील उस्मानपुरा परिसरातील एका शाळेत दाखल झाले. संबंधित कंपनीकडून ऑनलाइन संगणकीय परीक्षा घेण्यात येणार असल्याचे विद्यार्थ्यांना सांगण्यात आले होते. त्यामुळे परीक्षा केंद्रावर संगणक आणि इतर आवश्यक सुविधा उपलब्ध असतील, अशी त्यांची अपेक्षा होती.
मात्र, केंद्रावर पोहोचल्यानंतर विद्यार्थ्यांना एकही संगणक किंवा परीक्षेसाठी आवश्यक व्यवस्था दिसून आली नाही. परीक्षा नेमकी कशी होणार, याबाबत विद्यार्थ्यांनी तेथील व्यक्तींकडे विचारणा केली. मात्र, त्यांना समाधानकारक माहिती मिळाली नसल्याचा आरोप विद्यार्थ्यांनी केला आहे. (Maharashtra News)
दरम्यान, परीक्षा घेण्यासाठी आलेल्या कथित थर्ड पार्टी कंपनीच्या प्रतिनिधींनीही या परीक्षेबाबत आपल्याला माहिती नसल्याचे सांगितल्याचा विद्यार्थ्यांचा दावा आहे. त्यामुळे संतप्त विद्यार्थ्यांनी या संपूर्ण भरती प्रक्रियेवर प्रश्न उपस्थित केले. भरती अधिकृत असल्याचे भासवून विद्यार्थ्यांकडून पैसे घेण्यात आल्याचा आरोप होत असून, या प्रकरणाची सखोल चौकशी करण्याची मागणी करण्यात येत आहे.
घटनेची माहिती मिळताच पोलीसही परीक्षा केंद्रावर दाखल झाले. आता या भरतीमागे नेमके कोण आहेत, विद्यार्थ्यांकडून जमा करण्यात आलेल्या शुल्काचे काय झाले आणि ही प्रक्रिया अधिकृत होती का, याचा तपास होणे आवश्यक आहे. (Job Fraud)